2017 jylǵa qaraı elordada jeńil relsti júrdek tramvaı júre bastaıdy
ASTANA. 5 aqpan. QazAqparat - 2017 jylǵa qaraı Astanada jeńil relsti júrdek tramvaı jelisin iske qosý josparlanýda.
Ol qala aýmaǵynda 50 shaqty qurammen qyzmet kórsetetin bolady. Bul týraly Astana ákimdiginiń resmı saıtynan habarlandy,
«Qazirgi tańda Prezıdent pen Úkimet basshysynyń tapsyrmasyna sáıkes, elorda ákimdigi «Astana qalasynyń jańa kólik júıesi» jobasyn júzege asyrýda. Jobada jeńil relsti júrdek kóliktiń jelisin qurý qarastyrylady. Bul kólik túri bas qalanyń negizgi transporttyq júıesine aınalady jáne qaladaǵy qoǵamdyq kóliktiń barlyq túrlerin biriktiredi. Jeńil relsti kólikti tramvaıdyń jańa túri retinde atasa da bolady», - delingen baspasóz habarlamasynda. Jobaǵa sáıkes, ony júzege asyrý úsh kezeńdi qamtıdy. Jeliniń jalpy uzyndyǵy 42,1 shaqyrymdy qurasa, onyń jerústi ýchastogy 12, estakadalyq joly 30 shaqyrymdy quraıdy. Astananyń klımattyq erekshelikterin eskere otyryp, jabyq stansalarda jeldetkishter men jylytqyshtar da qarastyrylatyn bolady. Jolaýshylar qaýipsizdigi men jaılylyǵy úshin jerasty ótpeleri, lıftiler men ekskalatorlar qamtylady.
