2017 jylǵa qaraı elimizdegi poshta bólimsheleriniń barlyǵy avtomattandyrylady
ASTANA. QazAqparat - 2017 jylǵa qaraı elimizdegi poshta bólimsheleriniń barlyǵy avtomattandyrylady. Bul týraly búgin Parlament Májilisinde «Poshta týraly» zań jobasyn tanystyrǵan Investıtsııalar jáne damý vıtse-mınıstri Sáken Sársenov málim etti.
Vıtse-mınıstrdiń sózine qaraǵanda, qazirgi tańda Qazaqstannyń ulttyq poshtasynda shamamen 22 907 qyzmetker jumys isteıdi. Al respýblıka boıynsha 3300-den astam poshta baılanysynyń bólimsheleri bar. «Olardyń 30 paıyzy - qalalyq jáne 70 paıyzy - aýyldyq jerlerde ornalasqan. Aǵymdaǵy jyly poshta baılanysy bólimsheleriniń 67 paıyzy avtomattandyryldy. 2017 jylǵa qaraı barlyq bólimshelerdi avtomattandýrý josparlanýda», - deıdi S.Sársenov. Onyń aıtýyna qaraǵanda, Qazaqstannyń aýmaǵynda poshta baılanysy qyzmetterin sheteldik operatorlar da kórsetip keledi. Sonyń ishinde poshta qyzmetin lıtsenzııalaýdy alyp tastaǵannan keıin 2014 jylǵy jaǵdaı boıynsha Qazaqstan naryǵynda 114 poshta operatory jumys isteıdi. «Qazirgi málimetter boıynsha bizdiń aýyldyq eldi mekenderde «Qazposhta» AQ-ynda 7 600 poshtashy jumys isteıdi jáne olardyń ortasha jalaqysy 10 000-15 000 teńge shamasynda. Sonymen qatar «Qazposhta» AQ-nyń aýylda ornalasqan 2 466 bólimshe bolsa, sonyń 72 paıyzy jaldanbaly bólimsheler, al 10 paıyzy nashar jaǵdaıda bolyp otyr. Olardyń 50 paıyzdan astamy poshtalyq-qarjylyq qyzmetterdi kórsetý talaptaryna esh sáıkes kelmeıdi», - deıdi S.Sársenov.
