2017 jylǵa qaraı elimizde qazaq tilin meńgergender sany 80 paıyzǵa jetetinine esh kúmán joq - M. Qul-Muhammed
ANA. 6 maýsym. QazAqparat /Qanat Mámetqazyuly/ - 2017 jylǵa qaraı elimizde qazaq tilin meńgergender sany 80 paıyzǵa jetetinine esh kúmán joq.
Bul týraly búgin QR Parlamenti Májilisinde ótken Úkimet saǵatynda Mádenıet mınıstri Muhtar Qul-Muhammed aıtty.
«Memleket basshysy bizdiń aldymyzǵa jańa mindetter qoıyp otyr. Máselen, 2017 jyly memlekettik tildi erkin meńgergen qazaqstandyqtar sany 80 paıyzǵa jetse, 2020 jyly olar 95 paıyzdan kem bolmaýy tıis. Osyǵan kúmán keltiretin adamdar da barshylyq. Soǵan qatysty túsinikteme bergim keledi, búgingi kúni Qazaqstandaǵy qazaqtardyń sany 65 paıyz. Eger 1991 jyly solardyń ishinde qazaqsha túk bilmeıtinder bolsa, búgingi kúni qazaqsha múldem bilmeıtin qazaq joq. Aýyzeki tilde barlyq qazaq ana tilin meńgergen, aıtqan sózdi de túsinedi. Bálkim til shorqaqtyǵynan sóıleýge uıalatyn bolar. Sonymen qatar bul toptyń barlyǵy birdeı qazaq tilin ádebı deńgeıde meńgerip ketedi dep aıta almaımyz. Biraq, qazaqstandyqtardyń qazaq tilin aýyzeki tilde bilý deńgeıiniń 2017 jylǵa qaraı 80 paıyzǵa kóteriletinine meniń esh kúmánim joq. Óıtkeni, qazaqtardyń ózi 65 paıyz bolsa, arjaǵyndaǵy 15 paıyzdy toltyrý da ońaı», - dedi M. Qul-Muhammed.
Onyń aıtýynsha, aldaǵy onjyldyqtaǵy basty maqsat - Qazaqstanda turatyn barlyq etnostar tilin saqtaı otyryp, ult birligin nyǵaıtýdyń mańyzdy faktory retinde memlekettik tildiń keń aýqymdy qoldanylýyn qamtamasyz etetin úılesimdi til saıasaty.
