2017 jylǵa qaraı Astana áýejaıy 5 mln-ǵa deıin jolaýshylar qabyldaıdy
ASTANA. 26 aqpan. QazAqparat - 2017 jylǵa qaraı Astana áýejaıyna qonatyn jáne ushatyn reıster sanyn 20 myńǵa deıin arttyrý josparlanyp otyr. Osynyń arqasynda jolaýshylar sany 5 mıllıonǵa deıin kóbeıedi. Bul týraly Astana qalasynyń ákimdiginen habarlandy.
Al áýejaıdyń baspasóz qyzmetiniń málimetteri boıynsha, tek 2012 jyly jolaýshylar tasymaly 2011 jylmen salystyrǵanda 14 paıyzǵa artyp, 2 303 143 adamǵa jetken. Jalpy, ótken jyldyń qorytyndysy boıynsha Astana áýejaıynda 17 498 reıske qyzmet kórsetilgen. 2011 jyly Astananyń halyqaralyq áýejaıynan ushqan jáne qonǵan reıster sany 15 325, al jolaýshylardy tekserip ótkizý pýnktinen saǵatyna 750 adamǵa deıin ótken.
Sonymen qatar, Astananyń geografııalyq ushý aımaǵyn keńeıtý maqsatynda, Kólik jáne kommýnıkatsııa mınıstrligi men «Astana halyqaralyq áýejaıy» AQ sheteldik áýe kompanııalarymen jańa halyqaralyq baılanystar ornatý jónindegi jumystardy júrgizip keledi. Esterińizde bolsa, «Air Astana» áýe kompanııasy alǵash ret 2012 jyly Baký, Tashkent, Beıjiń, Sankt-Peterbor qalalaryna reıs ashqan bolatyn. 2012 jyldyń 27 tamyzynan bastap «China Southern» áýe kompanııasy Astana men Úrimshi arasyndaǵy reısti jańartty.
