2017 jylǵa qaraı aqparattyq-kommýnıkatsııalyq tehnologııalardyń JІÓ-degi úlesi 3,8 paıyzǵa jetedi
ASTANA. QazAqparat - Búgin Májiliste «Aqparattandyrý týraly» jańa redaktsııadaǵy zań jobasynyń tanystyrylymy bolyp ótti.
Investıtsııalar jáne damý vıtse-mınıstri Asqar Jumaǵalıevtyń aıtýynsha, zań jobasynyń maqsaty «elektrondy úkimet» qurylymynyń quqyqtyq bazasyn qalyptastyrý, aqparattyq-kommýnıkatsııalyq tehnologııalar naryǵyn damytýdy memlekettik qoldaý, memlekettik organdar qyzmetiniń bıznes pen halyq úshin qoljetimdiligi men ashyqtyǵyn, aqparattyq qoǵamǵa ótý sharttaryn jasaý bolyp tabylady. Sonymen qatar, qujat «Aqparatty Qazaqstan-2020» memlekettik baǵdarlamasynda kózdelgen nysanaly ındıkatorlarǵa qol jetkizýdi kózdeıdi.
«Atap aıtqanda, 2017 jyly elimizde aqparattyq kommýnıkatsııalyq tehnologııalar sektorynyń JIÓ-degi úlesi 3,8 paıyzǵa jetedi. 2017 jyly menshikti lıtsenzııalyq baǵdarlamalyq qamtamasyz etýge, menshikti aqparattyq júıelerdi satyp alýǵa memlekettik organdardyń shyǵyny 40 paıyzǵa qysqarady», - dedi vıtse-mınıstr.
Bul rette A. Jumaǵalıev zamana aǵymyna saı aqparattyq-kommýnıkatsııalyq tehnologııalar salasy udaıy jetildirip otyrýdy qajet etetinin, al qoldanystaǵy zań óziniń mindetin atqaryp shyqqanyn atap ótti. «Jańa redaktsııadaǵy zań Qazaqstanda álemdik oń úderister tájirıbesin júzege asyrýǵa múmkindik týǵyzady», - dedi ol.
