2017 jylǵa qaraı 9 synyp oqýshylary «Dintaný» pánin mindetti pán retinde oqıtyn bolady
ASTANA. 24 mamyr. QazAqparat - Búgin QR Bas prokýratýrasynda talqylanǵan Dinı ekstremızmmen jáne terrorızmmen kúres jónindegi memlekettik baǵdarlamaǵa sáıkes 2017 jylǵa deıin elimizdiń barlyq mektepteriniń 9 synyp oqýshylary «Dintaný» pánin mindetti túrde oqıtyn bolady.
Bul týraly Baǵdarlama týraly óz oıymen bólisken Astanadaǵy Áziret Sultan meshitiniń bas ımamy Qaırat Joldybaıuly aıtty.
«Baǵdarlamada kóp nárse qarastyrylǵan. Eń bastysy, mektep jasyndaǵy balalarǵa buryn 9 synypqa arnalǵan Dintaný páni tańdaýly pán retinde júrgen bolsa, osy baǵdarlamada sony mindetti etip bekitý jaǵy qarastyrylyp otyr», - dedi ol.
Onyń aıtýynsha, baǵdarlamada sondaı-aq, arnaıy rolıkter, fılmder túsirý, kitaptar, kitapshalar shyǵaryp, taratý, ǵylymı-zertteý ınstıtýtyn qurý sııaqty keshendi, aýqymdy jumystar qarastyrylǵan.
Aıta ketý kerek, Baǵdarlamanyń jobasynda jazylǵandaı, 2017 jylǵa qaraı tehnıkalyq, kásiptik jáne joǵary oqý oryndarynda da jastardyń dástúrli dinderdi jan-jaqty túsinip, túrli jat aǵymdardan boıyn aýlaq ustaıtyndaı deńgeıde dinı bilimdi úıretý máselesi de 100 paıyz qamtamasyz etiletin bolady.
«Eger osy baǵdarlamada qarastyrylǵan barlyq maqsattar iske asyp, bes jyl boıy jumys isteıtin bolsa, ekstremızm men terrorızmniń aldy alynady degen pikirdemin», - dep oı túıdi Q. Joldybaıuly.
