2017 jylǵa deıin «Qazposhta» bólimsheleri 100 paıyz ortaq baılanys torabyna qosylady
ASTANA. QazAqparat - 2017 jylǵa deıin «Qazposhta» bólimsheleri 100 paıyz ortaq baılanys torabyna qosylady. Bul týraly búgin «Qazposhta» AQ basqarmasynyń tóraǵasy Baǵdat Mýsın málim etti.
«Bizdiń 3373 bólimshemiz bar, olardyń 70 paıyzy aýylda, shalǵaı eldi mekende, 30 paıyzy qalalyq jerde ornalasqan. Olardyń jumystaryn durystap uıymdastyrý úshin ortaq júıege qosý qajet. Aqparattyq ortaq júıe bolmasa, olardyń jumysyn baqylaý, qadaǵalaý qıyndyqqa túsedi. Búgingi tańda osy bólimshelerdiń 67 paıyzyn baılanys toraptaryna qostyq. 2017 jylǵa deıin barlyq bólimsheler 100 paıyz baılanys torabyna qosylady», - dedi B.Mýsın.
Onyń atap ótýinshe, «Qazposhta» shtatynda búgingi kúni 22 800 jumysshy bar. Olardyń 6 myńǵa jýyǵy poshtashy, 3300-i operator, qalǵandary suryptaýshy, júrgizýshi-ınkasator jáne basqa da qyzmetkerler.
«Shtatymyz úlken bolǵandyqtan bizge áleýmettik turaqtylyq kerek. Osy áleýmettik turaqtylyqty aıqyndaıtyn «Samuryq-Qazyna» qorynyń arnaıy reıtıngisi bar. Sol reıtıngke sáıkes kompanııadaǵy áleýmettik turaqtylyq 2013 jyly 55 paıyzdy qurasa, al 2014 jyly 12 paıyzǵa ósip, 67 paıyzǵa deıin jetti. Árıne, bul 100 paıyz emes. Degenmen, sarapshylar áleýmettik turaqtylyq dınamıkasy bar ekendigin, osy dınamıkany saqtaıtyn bolsaq, onda áleýmettik turaqtylyq bar dep esepteýge bolatynyn aıtty», - dedi «Qazposhta» basshysy.
