2017 jyldyń maýsymynan bastap bankter tólemder men aqsha aýdarymdaryn kúnbe-kún jasaýǵa mindetteledi - UB

ASTANA. QazAqparat - 2017 jyldyń maýsymynan bastap bankter tólemder men aqsha aýdarymdaryn kúnbe-kún jasaýǵa mindetti bolady. Bul týraly búgin Májiliste «Tólemder jáne tólem júıeleri týraly» zań jobasynyń tanystyrylymy barysynda málim boldy.

Eske salaıyq, zań jobasy Memleket basshysy N. Nazarbaevtyń jedel tólemder operatorlarynyń qyzmetin retteý týraly tapsyrmasyn oryndaý maqsatynda ázirlengen.  

Ulttyq bank tóraǵasynyń orynbasary Alpysbaı Ahmetovtyń aıtýynsha, zań jobasy arqyly tólemder men aqsha aýdarymdaryn júzege asyrý tártibi aıqyndalatyn bolady.

«Tólem qyzmetterin, tutynýshylardyń múddelerin qorǵaýǵa baǵyttalǵan jańalyqtar qamtylyp otyr. Máselen, eger zań jobasy qabyldansa bankterdiń tólemderdi oryndaý merzimi qysqartylady. Atap aıtqanda, qazirgi kúni elimizdegi ekinshi deńgeıli bankterde tólem oryndaý merzimi tórt kúnge deıin sozylyp otyr. Al qujat qabyldansa, bul merzim eki kúnge deıin qysqarady. Sonymen qatar, 2017 jyldyń maýsymynan bastap bankter tólemder men aqsha  aýdarymdaryn kúnbe-kún jasaýǵa mindetti bolady», - dedi Alpysbaı Ahmetov.

Onyń sózine qaraǵanda, ekinshi deńgeıli bankter qyzmetinde aqsha jáne tólem aýdarymdaryn jedeldetý qarapaıym halyqqa da, bızneske de asa tıimdi.