2017 jyldan beri parashıýtpen sekirý kezinde 5 sarbaz qaza tapty - senator

ASTANA. QazAqparat - Josparly jattyǵýlar ótkizgen birneshe jyl ishinde armııada 5 áskerı qyzmetshi qaza tapty. Senator Gennadıı Shıpovskıh óziniń depýtattyq saýalynda sarbazdardyń qaýipsizdigin qamtamasyz etý máselelerin kóterdi, dep habarlaıdy QazAqparat tilshisi.

Depýtat áskerı qyzmetshiler beıbit ýaqytta qaza tapqanyna toqtala kele, josparly oqý-jattyǵý kezinde múgedek bolý oqıaǵalary da kezdesetinin aıtty.

Senatordyń pikirinshe, munyń sebepteriniń biri – jattyǵý kezinde qaýipsizdik erejelerin qamtamasyz etý deńgeıiniń tómendigi.

«2017 jyldan beri parashıýtpen josparly sekirý oqý-jattyǵýy kezinde Otan qorǵaýshymyzdyń beseýinen aıyrylyp otyrmyz. Budan ózge, 2019 jyly Mańǵystaý oblysynda áskerılerdiń oqý-jattyǵýy kezinde granata jarylyp, sarbaz qolynan aıyryldy. Osy sekildi, áskerde oqý-jattyǵý kezinde tehnıkalyq qaýipsizdik erejelerin saqtamaý sebebinen granata jarylyp, qarý atylyp ketý nemese basqa da saldar boıynsha qanshama faktiler tirkeldi. Olardyń biri densaýlyqtan aıyrsa, biri janynan aıyryp jatyr. Bundaı oqys oqıǵalar birneshe márte bolsa da, odan áli sabaq almadyq. Atalǵan oqıǵalar áskerdegi tehnıkalyq qaýipsizdik sharalaryna tıisti deńgeıde nazar aýdarylmaıtynyn baıqatty», - dedi Gennadıı Shıpovskıh Bas prokýratýraǵa joldaǵan saýalynda.

Eske salsaq, bıyl 18 qańtar kúni Astana qalasynyń mańaıynda parashıýtpen josparly sekirý boıynsha oqý-jaýyngerlik tapsyrmalaryn oryndaý barysynda merzimdi qyzmettegi sarbaz qaza tapty.