2017 jyldan bastap retteletin naryqtaǵy baǵany retteý joıylady - UEM

ASTANA. QazAqparat - 2017 jyldyń qańtar aıynan bastap elimizde retteletin naryqtaǵy baǵany retteý joıylady. Bul týraly búgin Májiliste «Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyn tanystarǵan Ulttyq ekonomıka vıtse-mınıstri Aıdar Áriphanov málim etti.

«Monopolııaǵa qarsy zańnamany jetildirýdiń birinshi kezeńinde elimizdiń ulttyq zańnamasy Ekonomıkalyq yntymaqtastyq jáne damý uıymynyń standarttaryna jáne úzdik álemdik tájirıbelerge sáıkestendirildi. Byltyr Kásipkerlik kodeksi qabyldanyp, «Básekelestik týraly» zańnyń normalary soǵan shoǵyrlandyryldy, basqa da zańnamalyq ózgerister jasaldy. Osynyń arqasynda birqatar naqty sharalar júzege asyp jatyr. Birinshi memlekettiń kásipkerlik qyzmetke aralasýyn shekteý tetikteri engizildi. 2016 jyldan bastap osy baǵyttaǵy zańdy tulǵalar qyzmetiniń túrleri 47 paıyzǵa qysqarady. Sonymen qatar, 2017 jyldyń qańtarynan bastap retteletin naryqtar men domınanttar reestrinde baǵalyq retteýler joıylatyn bolady. Bunymen qosa, alǵash ret zańnama deńgeıinde «baǵa mámileleri» atalatyn «kartel» uǵymy engizilip otyr», - dedi vıtse-mınıstr.

Onyń aıtýyna qaraǵanda, zańnamalyq jetildirý aıasynda básekelestikti qorǵaý salasynda zańnyń buzylýyna jol bermeý týraly aldyn alý ınstıtýty engizilip, monopolııaǵa qarsy organ janynan básekelestik salasyndaǵy materıaldardy qaraý boıynsha kelisim komıssııasy quryldy. «Budan bólek, monopolııaǵa qarsy kúres organdary úshin memlekettik organdardyń atyna básekelestikti damytý men qamtamasyz etýge baǵyttalǵan áreketterin jetildirýdiń qajettiligi týraly uıǵarym engizý boıynsha quqyq berilip otyr», - deıdi A. Áriphanov.