2017 jyldan bastap oqýshylardyń biryńǵaı bazalyq oqýlyqtary bekitiledi - G. Isimbaeva
ASTANA. QazAqparat - 2017 jyldan bastap oqýshylardyń biryńǵaı bazalyq oqýlyqtary bekitiledi. Bul týraly búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bilim berý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.
Depýtat Gúlmıra Isimbaevanyń aıtýynsha, zań jobasynda «100 naqty qadam» Ult josparynyń 76-77-78 qadamdaryn júzege asyrý maqsatyndaǵy naqty normalar qamtylǵan. Budan bólek, zań jobasynda Parlamenttik tyńdaýlardyń, Úkimet saǵattarynyń qorytyndylaryna oraı usynystar da kórinis tapqan.
«Máselen, 2017 jyldyń 1-qańtarynan bastap bastaýysh synyptar úshin, 2020 jyldyń 1-qańtarynan bastap negizgi orta bilim berý uıymdary úshin, 2022 jylǵy 1-qańtardan bastap, jalpy orta bilim berý uıymdary úshin biryńǵaı bazalyq oqýlyqty aıqyndaý jáne bekitý ýákiletti organnyń quzyryna beriledi. Sonymen qatar, oqýshylardy oqýlyqtar men oqý ádistemelik keshenmen qamtamasyz etýdiń naqty merzimi belgilendi. Endi olar zańǵa sáıkes jyl saıyn 1-tamyzǵa deıin bilim berý uıymdaryna jetkizilýi tıis», - dedi depýtat.
Onyń aıtýynsha, zań jobasynda pedagogtardy jumysqa qabyldaýdyń talaptary da naqtylanǵan. Máselen, densaýlyǵynda kinárat bar, psıhıatrııalyq nemese narkologııalyq esepte turatyn adamdar pedagog bola almaıdy.
