2017 jyldan bastap memlekettik tapsyryspen oqyǵandar úsh jyl mamandyǵy boıynsha jumys isteýge mindetti bolady
ASTANA. QazAqparat - 2017 jylǵy 1 qańtardan bastap memlekettik bilim berý tapsyrysy boıynsha oqyǵan adamdarǵa oqý ornyn bitirgennen keıin keminde úsh jyl mamandyǵy boıynsha mindetti jumyspen óteý normasy engiziledi. Bul týraly búgin Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda málim boldy. Onda komıtet depýtattary «Qazaqstan Respýblıkasynyń keıbir zańnamalyq aktilerine bilim berý máseleleri boıynsha ózgerister men tolyqtyrýlar engizý týraly» zań jobasyn talqylaǵan edi.
Aıta keteıik, atalǵan qujat boıynsha birqatar zańnamalyq aktilerdiń normalary «Bilim týraly» zańǵa engiziletin ózgerister jáne tolyqtyrýlarǵa sáıkes keltiriledi.
Zań jobasynda qamtylǵan negizgi jańalyqtardyń biri bilim berý júıesine dýaldi oqytýdy engizýge qatysty bolyp tabylady. Sarapshylardyń aıtýynsha, bul stýdentterdiń mindetti óndiristik tájirıbeden ótýin kózdeıdi jáne oqý oryndary men jumys berýshilerdiń bilikti mamandar daıarlaý úshin jaýapkershiligin zańnamalyq turǵydan belgileıdi, birinshi jumys mamandyqtaryn alǵan adamdarǵa tegin tehnıkalyq jáne kásiptik bilim alýǵa memlekettik kepildik engiziledi.
«Zań jobasymen 2017 jylǵy 1 qańtardan bastap memlekettik bilim berý tapsyrysy boıynsha oqyǵan adamdarǵa oqý ornyn bitirgennen keıin keminde úsh jyl mamandyǵy boıynsha mindetti jumyspen óteý normasy engiziledi. Áskerı jáne arnaýly oqý oryndaryn qospaǵanda, halyqaralyq akkredıtteýden ótken jaǵdaıda ǵana, 2017 jylǵy 1 qańtardan joǵary jáne joǵary oqý ornynan keıingi, al 2020 jylǵy 1 qańtardan tehnıkalyq jáne kásiptik, orta bilimnen keıingi uıymdardyń memlekettik úlgidegi qujattar berýine ruqsat berý jolymen birtindep attestattaýdan akkredıtteýge ótý usynylady», delingen komıtette taratylǵan aqparatta. Budan basqa, oqytýdyń sapasyn arttyrý maqsatynda bilim berý uıymdarynda qabyldaýǵa, daıarlaýǵa, jáne pedagogtardyń jumysyna qoıylatyn talaptar qataıtylady. Bilim berý deńgeıleri boıynsha oqýlyqtardyń, oqý-ádistemelik keshenderdiń jáne oqý quraldarynyń saraptamasyn júrgizý uıymdary jónindegi qyzmetke memlekettik monopolııa engiziledi.
