2017 jyldan bastap bala asyrap alýshynyń jasyna qoıylatyn shekteý joıylady

ASTANA. QazAqparat - 2017 jyldan bastap bala asyrap alýshylardyń jasyna shekteý qoıylmaıdy. Bul týraly «QazAqparattyń» resmı saýalyna jaýap bergen QR BǴM Balalardyń quqyqtaryn qorǵaý komıtetinen habarlandy.

Atap aıtqanda, bul rette zeınetkerlik jastaǵy adamdar da bala asyrap alýyna múmkindikter jasalady. Osy oraıda bul qadamnyń tıimdi nátıje berip, bul baǵyttaǵy sharalar elimizde bala asyrap alý úrdisin arttyrýy yqtımal.

«Asyrap alýshy men asyrap alynatyn bala arasyndaǵy jasqa qoıylatyn shekteýdiń alynyp tastalýy asyrap alynatyn balalar sanynyń artýyna yqpal etedi», - dep atap ótilgen komıtet málimetinde.

Aıta keteıik, búginde elimizde jetim jáne ata-anasynyń qamqorlyǵynsyz qalǵan balalar sany 29 myń 666-ny qurap otyr. «Olardyń ishinde qazaqstandyq azamattardyń otbasylarynda 19 761 bala tárbıelenýde, patronattyq tárbıede - 1839 bala bar. Ata-anasynyń qamqorlyǵynsyz qalǵan 8 066 bala tolyq memlekettiń qamqorlyǵynda. Sonyń arasynda  6436 bala bilim berý júıesindegi 106 balalar úılerinde tárbıelenýde. 828 bala densaýlyq saqtaý júıesindegi 23 sábıler úılerinde, al  802 bala halyqty áleýmettik qorǵaý júıesindegi 17 múgedekterge arnalǵan úılerde tárbıelenýde», - delingen komıtet málimetinde.

2015 jyly jetim balalar men ata-anasynyń qamqorlyǵynsyz qalǵan balalardy tárbıeleıtin uıymdar 42 birlikke qysqardy, sondaı-aq 2016 jyldyń 9 aıynda osyndaı 6 uıym jabyldy.