2017 jyldan Áleýmettik medıtsınalyq saqtandyrý qoryna aýdarymdardy jınaqtaý bastalady

ASTANA. QazAqparat - 2017 jylǵy 1 qańtardan Áleýmettik medıtsınalyq saqtandyrý qoryna tıisti qarjy somany jınaqtaý bastalady. Bul týraly búgin Astanada Densaýlyq saqtaý jáne áleýmettik damý mınıstrliginiń keńeıtilgen alqa májilisi barysynda málim boldy.

«QR Densaýlyq saqtaý jáne áleýmettik damý mınıstrligi mamandary mindetti áleýmettik medıtsınalyq saqtandyrý boıynsha Jol kartasyn ázirlep, bekitti. Atalǵan qujatqa sáıkes, bıyl normatıvtik-quqyqtyq baza jasalyp, Áleýmettik medıtsınalyq saqtandyrý qory (ÁMSQ) qurylatyn bolady. Bul 2017 jylǵy 1 qańtardan bastap belgilengen somany jınaqtaý jáne 2017 jylǵy 1 shildeden bastap ÁMSQ arqyly medıtsınalyq qyzmetter tólemderin júzege asyrýǵa múmkindik beredi», - dep atap ótilgen mınıstrlik málimetinde.