2017 jyl MMA sportshylary úshin tabysty boldy - Aıdar Mahmetov
«Jalpy, 2017 jyl búkil Qazaqstannyń MMA sporty úshin óte tabysty ótti dep aıtýǵa bolady. Bıyl Astanada áýesqoılar arasynda V Álem chempıonaty ótti. Sonda Qazaqstan quramasy jalpy quramalyq esepte 2 altyn, 3 kúmis, 3 qola medalmen ekinshi oryn aldy. Eki altynmen qatar atalǵan chempıonatta Sanjar Ádilov eń úzdik sportshy bolyp tanyldy. Biz úshin bul úlken jetistik, zor abyroı», - deıdi Federatsııanyń qurmetti prezıdenti.
Onyń aıtýynsha, budan bólek Astanada ótken Álem birinshiligi MMA tarıhynda eń joǵary dárejede uıymdastyrylǵan chempıonat bolyp tanylǵan. Sonymen qatar, jyldyń basynda jastardyń tuńǵysh Álem chempıonatynda Qazaqstan quramasy 1 altyn, 4 qola medalǵa qol jetkizse, pankratıonnan Álem birinshiliginde eresekter arasynda 2 altyn jáne jastar arasynda 3 altyn medaldy jeńip aldy.
Al «MMA sportynyń sońǵy jyldary Qazaqstanda damýyna qalaı baǵa beresiz?» degen suraqqa Aıdar Mahmetov tyńǵylyqty jaýap bere kele, kásipqoı sportta bıik shyńdardy baǵyndyrǵan sportshylardy atap ótti.
«Jańa aıtyp jatqan tabystar men jeńister áýesqoı sportshylardyń qol jetkizgen jetistikteri. Al kásipqoı MMA-ǵa keler bolsaq, elimizde sporttyń bul túriniń aýqymy keńeıip keledi. Mysaly, Qýat Hamıtov baýyrymyz bıyl óte jaqsy jetistikterge qol jetkizdi. Aǵaıyndy Nazarovtardyń da eńbegi aqtalyp jatyr. Arman Ospanov ta baryn salyp óner kórsetip júr. Sodan basqa álemdiń TOP-10 reıtıngine enetin promoýshendar Qazaqstanda óziniń jekpe-jek keshin uıymdastyrdy. Bul da búkil Qazaqstan úshin óte úlken kórsetkish. Bul úrdister Qazaqstanda MMA sportynyń qalaı damyp kele jatqanyn kórsetedi. Álemdik promoýshenderdiń bizdiń elge qyzyǵýshylyq tanytýy - qazaq sportshylarynyń óte qarqyndy túrde ósip kele jatqanyn dáleldeıdi», - deıdi ol.
Ataqty sportshy elimizde MMA-nyń áýesqoı jáne kásipqoı túriniń damyp kele jatqanyna da joǵary baǵa berdi.
«Jalpy, QR MMA, pankratıon jáne greplıng ulttyq federatsııasy elimizde MMA-nyń damýyna barynsha úles qosyp keledi. MMA sportyn alǵa súırep júrgen barlyq halyqaralyq jáne álemdik uıymdarmen baılanys jasap jatyr. Sańlaqtarymyz aldaǵy ýaqytta da bıik asýlardy baǵyndyra bererine senimim zor», - dep túıdi sózin Aıdar Mahmetov.
