2017 jyly joǵalǵan azamattyń jeke basy DNQ arqyly anyqtaldy
ASTANA. KAZINFORM – Іshki ister mınıstrligi ótken jyldardaǵy qylmystardy ashý jáne habar-osharsyz ketkenderdi anyqtaý jumystary júıeli túrde jalǵasyp jatqanyn málimdedi.
Vedomstvo málimetinshe, zamanaýı krımınalıstıkalyq ádister men molekýlalyq-genetıkalyq zertteýlerdiń arqasynda aýyr jáne asa aýyr qylmystarǵa qatysy bar ondaǵan tulǵa anyqtalǵan.
– ІІM-niń molekýlalyq-genetıkalyq zerthanasynyń áleýeti aýyr jáne asa aýyr qylmystardy ashýǵa múmkindik berip otyr. Adam óltirý jáne zorlaý faktileri, onyń ishinde kámeletke tolmaǵandarǵa qatysty qylmystar áshkerelendi. Sonymen qatar habar-osharsyz ketken azamattardy anyqtaý jumysyna erekshe nazar aýdarylady. Máselen, 2017 jyly Semeı qalasynan shyǵyp ketip, joǵalǵan 27 jastaǵy er adamnyń jeke basy Qyzylorda oblysynda tabylǵan súıek qaldyqtaryna júrgizilgen DNQ-saraptama nátıjesinde anyqtaldy. Zamanaýı krımınalıstıkanyń múmkindikteri qylmys jasalǵan ýaqytqa qaramastan tulǵalardy anyqtaýǵa jáne kinálilerdi jaýapqa tartýǵa jol ashady. Eshbir qylmysker jazasyz qalmaýy tıis – bul Zań men Tártiptiń basty qaǵıdaty, – dedi ІІM baspasóz hatshysy Shuǵyla Turlybek.
Mınıstrlik málimetinshe, árbir osyndaı istiń artynda jedel ýákilder, tergeýshiler men krımınalısterdiń uzaq ári muqııat eńbegi jatyr.
Aıta keteıik, DNQ-kod kómegimen 2016 jyly Astanada zeınetkerdi óltirgen qylmysker ustaldy.
