2017 jylǵy BMW, 3 bólmeli páter: Qarjy vıtse-mınıstri menshiginde qandaı múlik bar ekenin aıtty
Qarjy vıtse-mınıstri Erjan Birjanov Úkimet úıindegi brıfıngide ıeligindegi múlikter týraly málimet berdi, dep Kazinform.
«Sybaılas jemqorlyqqa qarsy kúres zańynyń 11-baby boıynsha, saıası memlekettik qyzmetshiler 2025 jyldyń 1 qańtarynan bastap tabys deklaratsııasyn jarııalaý kerek. Ózim týraly aıtsam, negizgi deklaratsııada jeke menshigimdegi úsh bólmeli páterdi, avtokólikti kórsettim. Máshınem «dókeı» emes. 2017 jylǵy BMW kóligi. Ústimdegi kostıýmim Qazaqstan óndirisiniki. Tipti leıblin kórsete alam. Aıaq kıimim de Qazaqstandiki. Páterimniń aýdany – 74,5 sharshy metr», - dedi vıtse-mınıstr Úkimet úıinde ótken brıfıngi kezinde.
Degenmen, ol ıeligindegi páterdiń qunyn aıtpady.
«Onyń naryqtaǵy baǵasyn aıta almaımyn. Men deklaratsııada onyń nómirin, mekenjaıyn ǵana kórsettim. Al qunyn salyqty esepteıtin ýákiletti organdar baǵalaıdy. Men jyl saıyn sonyń negizinde salyq tóleımin», - dedi Erjan Birjanov.
