2017-2020 jyldary senimgerlik basqarýǵa 124 emhanany berý josparlanýda
ASTANA. QazAqparat - 2017-2020 jyldary senimgerlik basqarýǵa 124 emhanany berý josparlanýda. Bul týraly búgin Úkimet otyrysynda memlekettik menshik nysandaryn túgendeý máselesi boıynsha baıandama jasaǵan QR Qarjy mınıstri Baqyt Sultanov málim etti, dep habarlaıdy QazAqparat.
«2017-2020 jyldary senimgerlik basqarýǵa 124 emhanany berý josparlanýda. Ekinshi kezeńdi júzege asyrý úshin memlekettik múlik, bilim, densaýlyq saqtaý jáne basqa quqyqtyq aktilerge túzetýler engizýdi qajet etedi. Sondyqtan, ekinshi kezeń boıynsha qysqartý 2017-2019 jyldar kezeńin qamtıdy. Bul sharalar bıýdjettik shyǵystardy jáne memlekettik aktıvterdi basqarýdyń tıimdiligin arttyrady», - dedi Sultanov.
Mınıstrdiń aıtýynsha, túgendeý nátıjeleri boıynsha memlekettik menshikti ońtaılandyrý 2 kezeńmen júrgiziledi. Aldymen memlekettik menshik uıymdarynyń sany 1 myńnan asa uıymǵa nemese 16 paıyzǵa qysqarady. Ekinshi kezeńde taǵy 4 600-ge jýyq uıymǵa nemese bastapqy sanynan 65 paıyzǵa azaıtý usynylady.
Birinshi kezeńde uıymdar sany 1 136 kásiporynǵa qysqarady. Olardan: 408 uıym kestege engizilgen; 105 uıymdy kestege engizý usynylady; 380 uıym qaıta qurý jolymen qysqarady; 243 uıymdy taratý (joıý) usynylady. Sonymen, birinshi kezeńnen keıin memlekettik menshikte 6 myńnan az kásiporyn qalady. Qalǵan uıymdardyń negizgi bóligin balabaqshalar, kolledjder, aýrýhanalar quraıdy. Olar básekelestik ortaǵa ekinshi kezeńde usynylatyn bolady.
