12:50, 18 Qańtar 2017 | GMT +6
2016 jyly «JQJK 2020» baǵdarlamasy sheńberinde 5673 ınfraqurylymdyq joba júzege asyryldy
ASTANA. QazAqparat - 2016 jyly «Jumyspen qamtý jol kartasy 2020» baǵdarlamasynyń jumyspen qamtýdy ınfraqurylym men turmystyq-kommýnaldyq sharýashylyqty damytý arqyly qarastyratyn birinshi baǵytynyń aıasynda 5 673 ınfraqurylymdyq joba júzege asyryldy, dep habarlandy primeminister.kz saıtynda.
Atalǵan jobalardy júzege asyrý nátıjesinde 40 myń 927 adam jumysqa ornalasty. Onyń ishinde 22 myń 213-i - baǵdarlamaǵa qatysýshylar.
«JQJK 2020» baǵdarlamasynyń birinshi baǵyty aıasynda Qazaqstanda turmystyq-kommýnaldy sharýashylyq, bilim berý, densaýlyq saqtaý, áleýmettik qorǵaý, mádenıet, sport, abattandyrý, ınjenerlik-kólik ınfraqurylymy salalaryna jatatyn nysandar salynyp, jóndeýden ótkizildi.
Esterińizge sala keteıik, 2016 jyly «JQJK 2020» baǵdarlamasynyń birinshi baǵytyn iske asyrýǵa 80,1 mlrd teńge bólindi. Bul qarajat jobalardyń sany eskerile otyryp, jergilikti atqarýshy organdardyń tapsyrystary negizinde óńirler arasynda bólindi.
