2016 jyly JІÓ ósimi 1 paıyzdy qurady - Súleımenov
ASTANA. QazAqparat - 2016 jyly Qazaqstannyń jalpy ishki óniminiń ósimi 1 paıyzdy qurady. Bul týraly búgin QR Prezıdenti Nursultan Nazarbaevtyń tóraǵalyǵymen ótip jatqan Úkimettiń keńeıtilgen májilisinde elimizdiń Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
2016 jyl jańa syrtqy jáne ishki jaǵdaılarǵa beıimdelý turǵysynan ekonomıka úshin kúrdeli boldy. Energııa resýrstaryna baǵanyń qubylýy joǵary bolǵandyqtan jáne tutynýshylyq belsendilik tómendegendikten ekonomıkalyq belsendilik baıaýlady. Eger ótken jyldyń alǵashqy bes aıy ishinde jalpy ishki ónimniń tómendeýi baıqalsa, Sizdiń bastamańyzben qabyldanǵan «Nurly jol» memlekettik baǵdarlamasy men Daǵdarysqa qarsy jospar sheńberindegi sharalardyń arqasynda ekinshi jartyjyldyqtan bastap ósý qaıta jandandy. 2016 jyldyń qorytyndysy boıynsha jalpy ishki ónimniń ósýi bir paıyzdy qurady», - dedi mınıstr.
Onyń aıtýynsha, ozyq ósim dınamıkasyn myna salalar kórsetti: qurylys sektory 7,9, aýyl sharýashylyǵy sektory 5,5, kólik salasy 3,8 paıyz. Ekonomıkadaǵy taýar óndirisiniń úlesi 36,6 paıyzdy, qyzmet kórsetý úlesi 57,8Z paıyzdy qurady.
«Taý-ken óndirý ónerkásibi úshin kúrdeli jyl bolǵanyna qaramastan, óndeý ónerkásibiniń absolıýtti ósýi, sol sııaqty jalpy ishki ónim qurylymyndaǵy úlesiniń ósýi de oń faktor bolyp tabylady. Atalǵan úles 2015 jylǵy 10,3 paıyzdan jyl qorytyndysy boıynsha 10,7 paıyzǵa deıin ulǵaıdy. Aýyl sharýashylyǵynyń úlesi 4,9 paıyzǵa deıin (2015 jyly 4,7%) , qurylystyń úlesi 6,4 paıyzǵa deıin(2015 jyly 6,0%) ósti», - dedi ol.
Mınıstrdiń aıtýynsha, ekonomıkanyń ósýine áser etken basty faktorlardyń biri ınvestıtsııalyq belsendiliktiń artýy boldy. Negizgi kapıtalǵa quıylǵan ınvestıtsııalar kólemi 5,1 paıyzǵa ósip, 7,7 trıllıon teńgeni qurady.
