2016 jyly Ýnıversıada jalaýyn Ońtústik Amerıkanyń eń bıik shyńyna tikkim keledi - M. Jumaev

ALMATY. QazAqparat - 2016 jyly qysqy Ýnıversıada jalaýyn Ońtústik Amerıka qurlyǵynyń eń bıik shyńy - Akonkagýaǵa tigýdi josparlap otyrmyn. Bul týraly «QazAqparat» tilshisine bergen suhbatynda Qazaqstannyń ataqty alpınısi, alpınızm boıynsha eńbek sińirgen sport sheberi, dúnıejúzi boıynsha bıiktigi 8 myń metrden joǵary barlyq 14 shyńdy qosymsha otteginsiz baǵyndyrǵan alpınıst Maqsut Jumaev málim etti.

«Ýnıversıada týyn álemniń barlyq jeti qurlyǵyndaǵy eń bıik shyńdardyń basyna tigý týraly meniń jeke baǵdarlamam bar. Kúni búginge deıin Eýropanyń eń bıik shyńy - Elbrýsqa («Rýh ámirshisi», 5642 metr), Soltústik Amerıkanyń eń bıik shyńy - Denalıge («Uly taý», 6190 metr), Gımalaıdaǵy Djomolýngmaǵa («Jel ámirshisi», 8848 metr), Afrıkadaǵy Klımandjaroǵa («Jarqyn taý», 5895 metr) Ýnıversıada týyn tiktim. Endi 2016 jyly Ońtústik Amerıkanyń eń bıik shyńy - Akonkagýaǵa («Tas kúzetshi», 6962 metr) tigý josparymda bar. Muny árıne, osy qańtar nemese aqpan aılarynda jasaý kerek. Biraq, ázirge demeýshi tapqanym joq. Bir shyńdy baǵyndyrýǵa kem degende 3 mıllıon teńgedeı qarajat kerek. Jalpy, qalǵan eki shyń - Indonezııadaǵy Pýnchak Djaıa («Jeńis shyńy», 5030 metr) jáne Antarktıdadaǵy Vınsondy («amerıkalyq saıasatker Karl Vınsonnyń qurmetine atalǵan», 4892 metr) bir jyldyń ishinde baǵyndyrýǵa bolar edi. Demeýshi tabylsa, bolǵany. Sońǵy eki shyńdy Ýnıversıadaǵa deıin úlgere almasam, eń bolmasa «EKSPO-2017» kórmesine deıin qalaıda baǵyndyryp, Ýnıversıada jalaýyn ornatýǵa kúsh salamyn», - dedi M. Jumaev.

Aıta ketelik, 2017 jylǵy qysqy Ýnıversıada oıyndary Almaty qalasynda 28-shi qańtar men 8-shi aqpan aralyǵynda ótedi. Oǵan álemniń 55 elinen 2 myńnan astam sportshy qatysady. Ýnıversıada barysynda 3000 erikti jumyldyrylady jáne Ýnıversıadaǵa shet elderden qonaq jáne týrıst retinde 30 myń adam keledi dep josparlanǵan. Al teleaýdıtorııa 1 mlrd. kórermendi qamtıtyn bolady. Jarystar týraly telehabar álemniń 80 eline taratylady. Ýnıversıadanyń bıýdjeti eki esege deıin ońtaılandyryldy jáne ol 17 mlrd. teńgeni quraıdy.