2016 jyly «Taldyqorǵan-Óskemen», «Almaty-Qapshaǵaı», «Úsharal-Dostyq» joldarynyń qurylysy bastalady

Bul týraly búgin Úkimet otyrysynda QR Investıtsııalar jáne damý mınıstri Áset Isekeshev málim etti.

Onyń atap ótýinshe, 2015 jyldyń qorytyndysynda 618 shaqyrym avtomobıl jolynyń qurylysy aıaqtalyp, «Batys Eýropa - Batys Qytaı» jobasy aıasynda Shymkent pen Taraz arasynda qozǵalys jandanady. «Almaty-Qapshaǵaı», «Astana-Temirtaý», «Ortalyq-Shyǵys» jobalarynyń 9 ýchaskesi paıdalanýǵa beriledi.

«2016 jyly 9 jobany júzege asyrý úshin 240 mlrd. teńge bólý kózdelip otyr. 2016 jyldyń qorytyndysynda «Batys Eýropa-Batys Qytaı», «Beıneý-Aqtaý», «Astana-Temirtaý», «Almaty-Qapshaǵaı-Taldyqorǵan», «Astana-Petropavl» jobalaryn tolyq aıaqtaý josparlanýda», - dedi Á.Isekeshev.

Mınıstrdiń aıtýynsha, «Qazavtojol» kompanııasy Qytaıdyń Eksımbankinen qarjy tartý arqyly memlekettik-jekeshelik seriktestik negizinde «Taldyqorǵan-Óskemen», «Almaty-Qapshaǵaı», «Úsharal-Dostyq» syndy jobalar júzege asyrylmaq.

«Bul jobalardyń jalpy uzaqtyǵy 1,5 myń shaqyrymdy quraıdy. Qurylys jumystary 2016 jyly bastalady», - dedi ol.