2016 jyly sý ınfraqurylymyna 62,1 mlrd. teńge bólindi

ASTANA. QazAqparat - Bıyl sý ınfraqurylymyn damytýǵa «Nurly jol» jáne Óńirlerdi damytý baǵdarlamalary arqyly 75 jobany iske asyrý úshin 62,1 mlrd. teńge bólindi. Bul týraly búgin Úkimet otyrysynda QR Ulttyq ekonomıka mınıstri Qýandyq Bıshimbaev málim etti.

Onyń atap ótkenindeı, «Aq bulaq» baǵdarlamasy iske asyrylǵan 2011-2015 jyldar aralyǵynda ortalyq sý júıesimen qamtý qalalarda 5 %-ǵa (82%-dan 87%-ǵa deıin), aýyldarda 9%-ǵa (42,5%-dan 51,5%-ǵa deıin) ósti. Ortalyq sý burý júıesi qalalarda 8%-ǵa(73%-dan 82%-ǵa deıin), aýyldarda 2,2%-ǵa (8,8%-dan 11%-ǵa deıin) ulǵaıdy. Sý qubyrlarynyń tozýy 6,1%-ǵa (67,9%-dan 61,8%-ǵa deıin),sý burý jelileri 5,9%-ǵa (66,1-dan 60,2%-ǵa deıin) tómendegen.

«Osy maqsatta respýblıkalyq bıýdjetten 396,8 mlrd. teńge bólindi. Qala men aýyldarda sýmen qamtý jáne sý burý salasynda 1493 joba iske asyrylǵan. Bıyl «Nurly jol» jáne Óńirlerdi damytý baǵdarlamalary arqyly 75 jobany iske asyrý úshin 62,1 mlrd. teńge bólindi, 2017 jylǵa 157 jobany iske asyrý úshin 53,0 mlrd. teńge kózdelip otyr», - dedi Q. Bıshimbaev.

Mınıstr Úkimet otyrysynda óńirlerde jalpy aýyldyq eldi mekenderdi damytý jobalaryn memleketten qarjylandyrýdy, al qalalyq eldi mekenderdi bıýdjetten tys kózderden qarjylandyrýdy usyndy.

Halyqaralyq qarjy uıymdary (HQU) men ózge de qarjy kózderin tartý tetikteri engizildi. Ol sýmen qamtý júıesin damytý úshin bıýdjetten tys qarjy tabýǵa yntalandyrady. Búgingi tańda halyqaralyq qarjy uıymdarynan 17,9 mlrd. teńge qarjy tartyldy.

«Kommýnaldyq jáne jekemenshik sý arnalarynyń tájirıbesi Halyqaralyq qarjy uıymdarynan (Eýropa Qaıta qurý jáne Damý Bankiniń (EQQDB) qaryz tartý jáne Ulttyq qordan qosa qarjylandyrý arqyly iske asatyn jobalar qalada memlekettik bıýdjetten tys júzege asatynyn kórsetti. Bul jumys kelesi jyly da jalǵasady. Búgingi tańda Eýropa Qaıta qurý jáne Damý Banki aldyn ala kelisimderge qol qoıǵan jáne 4 sý arnasyn qarjylandyrý jobalaryn daıyndap jatyr («Qostanaı Sý» (4,2 mlrd. teńge), «Kókshetaý sý arnasy» (3,3 mlrd. teńge), «Semeısýarnasy» (2,3 mlrd. teńge), «Óskemen sý arnasy»( 4,1 mlrd. teńge)», - dedi ol.

Sondaı-aq, qaladaǵy sý arnalaryn bıýdjetten tys qarjylandyrý kózderin qurý úshin qazaqstandyq damý ınstıtýttarynyń («Báıterek» ulttyq basqarýshy holdıngi» AQ) múmkindikterin paıdalaný usynyldy.