2016 jyly parlament pen prezıdenttik saılaýdyń qatar ótýin boldyrmaýdyń joly - kezekten tys Prezıdent saılaýy - Májilis
ASTANA. QazAqparat - 2016 jyly parlament pen prezıdenttik saılaýdy qatar ótkizýdi boldyrmaýdyń joly - kezekten tys Prezıdent saılaýy. Búgin Parlament Májilisiniń jalpy otyrysynda Qazaqstan halqy Assambleıasy Keńesiniń kezekten tys Prezıdent saılaýyn ótkizý týraly usynysyn talqylaý barysynda depýtattar osyndaı máseleni alǵa tartty.
Atap aıtqanda, depýtat Jumataı Álıev prezıdenttik saılaý ótkizý arqyly ekonomıkanyń ósimin nyǵaıtý, júrgizilip jatqan saıasattyń sabaqtastyǵyn qamtamasyz etý turǵysynan mańyzdy ekenin aıtty. «Bul bastamaǵa shyn máninde balama joq. Sonymen birge, kelesi 2016 jyly prezıdenttik jáne parlamenttik saılaýlardy ótkizý merzimderi bir mezgilge týra keledi. Konstıtýtsııa normalaryn buljytpaı oryndaý maqsatynda bul eki saılaýdy da ár túrli ýaqytta ótkizgen jón», - deıdi J. Álıev.
Al Parlament Májilisiniń depýtattary atynan Úndeýdi jarııalaǵan spıker Qabıbolla Jaqypov taıaý ýaqytta búkil qoǵamnyń kúsh-jigeri álemdik daǵdarystyń qaýip-qaterlerin Otanymyzdy damytýdyń jańa múmkindikteri men perspektıvalaryna aınaldyrý isine baǵyttalýy tıis ekenin alǵa tartady.
«Parlament Májilisiniń depýtattary osy saılaý Qazaqstannyń memlekettigin odan ári nyǵaıta túsý jolyndaǵy asa mańyzdy strategııalyq kezeń bolatynyna senimdi. Buǵan qosa, el Prezıdentiniń kezekten tys saılaýyn ótkizý onyń ýaqyty jóninen kezekti parlament saılaýymen tuspa-tus kelýin boldyrmaýǵa múmkindik beredi. Sol arqyly saılaý naýqandarynyń sapasy men ishki saıası turaqtylyq qamtamasyz etiledi», - dedi Q. Jaqypov.
