2016 jyly kıikterdiń jalpy sany 108 myńnan asty
«QR Aýyl sharýashylyǵy mınıstrligi Qazaqstannyń bıoərtúrlilikti saqtaý qaýymdastyǵy jáne «Qazavıaqutqarý» AQ-men birlesip, Betpaqdala, Oral jáne Ústirt popýlıatsııasynyń kıikterine jasalǵan áýe sanaqtyń nátıjesi boıynsha, 2016 jyly kıikterdiń jalpy sany 108300 boldy. Atap aıtqanda, Betpaqdala taralymdarynyń sany 36200, Oral taralymy 70200 jáne Ústirt taralymy 1900 quraıtyny anyqtaldy»,-delingen vedomstvo málimetinde.
Belgili bolǵandaı, 2014 jyly zańsyz kıik aýlaýdyń, sondaı-aq, olardyń múıizin satý jáne satyp alýdyń 79 faktisi, 2015 jyly - 107 fakti, al 2016 jyldyń 5 aıy kóleminde 33 fakti tirkelgen.
«Kıikterdi saqtaý jolynda QR Aýyl sharýashylyǵy mınıstrligi Orman sharýashylyǵy jáne janýarlar dúnıesi komıteti naqty is-árekettermen qatar halyqaralyq yntymaqtastyq jolynda jumys jasaýda. Mysaly, Reseı Federatsııasymen jáne Ózbekstan Respýblıkasymen, Túrkimenstanmen kıikterdi saqtaý jónindegi kelisimge qol qoıylǵan. Kıikterdi saqtaý jónindegi halyqaralyq kelisim kórshiles respýblıkalardyń aýmaǵyn qamtıtyn kıikterdiń taralym aımaǵyna negizdelip jasalǵan. Búginde brakonerlikpen qarsy kúresti kúsheıtý úshin «Ohotzooprom» ÓB» bazasynda zamanaýı kólikpen qamtamasyz etilgen, tájirıbeli ınspektorlardan qurylǵan 4 arnaıy mobıldik top jumys isteıdi»,-deıdi mınıstrlik ókilderi.