2016 jyly qazaqstandyqtar 900 mln dollarǵa kólik aldy
ASTANA. QazAqparat - «QazAvtoProm» Qazaqstan avtomobıl salasy kásiporyndarynyń odaǵy 2016 jyldaǵy avtoreteıl kompanııalar jumysynyń qorytyndysyn shyǵardy, dep habarlaıdy QazAqparat.
2016 jyldyń qańtar-jeltoqsanynda resmı dılerler 43 845 jeńil jáne jeńil kommertsııalyq avtokólikterdi ótkizdi, bul kórsetkish ótken jylǵydan 53,6 paıyzǵa tómen boldy. Shetel valıýtasynda naryq 869,9 mln. AQSh dollaryn qurady.
Byltyrǵy qorytyndy boıynsha satylǵan 32 959 kólik ımportqa, al 10 886 mashına qazaqstandyq avtozaýyttardyń úlesine tıesili.
Elimizde suranysqa ıe brendterdiń kóshin «Toyota» bastap tur, ıaǵnı esepti kezeńde japondyq 8 809 mashına ótkizildi. «Lada» dılerleri 8 146 kólik satsa, úshtikke enip otyrǵan «Renault» kompanııasynyń 3 742 avtomobıli óz ıelerin tapty.
Modelder arasynda birinshi orynda «Toyota Camry» tur. Japondyq sedandy 3 148 myń satyp alýshy qalaǵan. Suranysqa ıe modelder bestigine «Lada Priora» (2285 kólik), «Lada 4x4» (2 221), «Lada Granta» (1883), sondaı-aq «Renault Duster» (1749) enip tur.
Sonymen qatar, qańtar-qazanda jańa kólikti satyp alý jaǵynan Almaty turǵyndary belsendilik (13155 avtomobıl) tanytqan. Osy rette ekinshi orynda Astana (7740 ) bolsa, al úshinshi orynnan Atyraý (3258) baıqaldy.
Avtomobıl salasy kásiporyndarynyń salyqtyq tólemi jyl nátıjesi boıynsha 18,9 mlrd. teńgeni qurap, bul kórsetkish 2015 jylǵydan 40 paıyzǵa tómendeý boldy.
Belgili bolǵandaı, tórtinshi toqsannyń qorytyndysy boıynsha aqshalaı mánde naryqta ósim boldy, ıaǵnı jeltoqsanda el turǵyndary kólik satyp alýǵa 293 mln. dollar jumsady.
