2016 jyly Qazaqstanda 6 mlrd. teńgege ındýstrıaldy aımaqtardy qarjylandyrý qarastyrylǵan

ASTANA. QazAqparat - 2016 jyly «Bıznestiń jol kartasy-2020» baǵdarlamasy aıasynda 6 mlrd. teńgege 6 ındýstrıaldy aımaqty qarjylandyrý qarastyrylǵan. Bul týraly búgin QR Ulttyq ekonomıka vıtse-mınıstri Aıdar Áriphanov málim etti.

«Bıznestiń jol kartasy-2020» baǵdarlamasy aıasynda Qazaqstannyń túrli oblystarynda ındýstrıaldy aımaqtardy qarjylandyrý boıynsha birqatar baǵyttar qarastyrylǵan. 2015 jyly biz 5,5 mlrd. teńgege qarjylandyrsaq, 2016 jyly elimizdiń 5 oblysynda 6 mlrd. teńgege 6 ındýstrıaldy aımaqtardy qarjylandyrý josparlanyp otyr», - dedi A. Áriphanov Astana ekonomıkalyq forýmy aıasyndaǵy Uly Jibek joly elderi forýmynda.

Onyń sózine qaraǵanda, búginde respýblıka boıynsha 42 ındýstrıaldy aımaq bar, onyń ishinde jalpy aýdany 8,5 myń gektar 15 aımaq qyzmet etýde, qalǵan 27-si qurylys kezeńinde.

«Jumys istep jatqan aımaqtardyń aýmaǵynda 2 mlrd. dollar ınvestıtsııamen 332 joba ornalasty. Jalpy, jobalanǵan ındýstrıaldyq aımaqtardy qurǵannan keıin, olardy jobalarmen tolyqtyrý jáne ınvestıtsııa tartý boıynsha qajettilik týyndaıdy»,-dedi vıtse-mınıstr.