2016 jyly Qazaqstanda 368,8 myń jumysshy qaýipti jaǵdaıda jumys istegen - Tamara Dúısenova
ASTANA. QazAqparat - Búgin Astana qalasyndaǵy «Kórme» ortalyǵynda QR Eńbek jáne halyqty áleýmettik qorǵaý mınıstrliginiń qoldaýymen, Dúnıejúzilik eńbekti qorǵaý kúnine oraı, eńbekti qorǵaý jáne ónárkásip qaýipsizdigi jónindegi «KIOSH-2016» VIІ qazaqstandyq halyqaralyq konferentsııasy men kórmesi óz jumysyn bastady.
Konferentsııa maqsaty - kásiporyndarda jaraqattanýdyń azaıýyna, óndiris nysandarynda apat qaýpin tómendetýge, qoǵamǵa jáne qorshaǵan ortaǵa tıgizetin shyǵyndy azaıtýǵa, kásibı aýrýlardyń aldyn alýǵa, eńbek ónimdiligin arttyrýǵa baǵyttalǵan memlekettik organdardyń, bıznestiń jáne qoǵamdyq uıymdardyń kúsh-jigerin biriktirý.
Konferentsııany ashqan QR Eńbek jáne halyqty áleýmettik qorǵaý mınıstri Tamara Dúısenova qaýipsiz eńbek jaǵdaıyn qamtamasyz etý men óndiristik jaraqattanýdy azaıtý Úkimet pen QR Eńbek jáne halyqty áleýmettik qorǵaý mınıstrligi úshin basty mindetterdiń biri ekenin atap ótti.
«Resmı statıstıkaǵa súıensek, 2016 jyly tekserýden ótken 1,7 mln kásiporyn jumysshylarynyń 368,8 myńy nemese árbir tórtinshi azamat qaýipti ári zııandy eńbek jaǵdaılarynda jumys istedi. Ótken jyldyń qorytyndysy boıynsha 670,3 myńnan astam adam zııandy eńbek jaǵdaıynda jumys istegeni úshin qosymsha eńbek demalysy, ústemaqy, qysqartylǵan jumys kúni jáne taǵy basqa járdem túrindegi ótemaqy aldy. Atalǵan maqsattarǵa jumys berýshiler 99,7 mlrd teńge kóleminde qarjy bóldi», - dep habarlady Tamara Dúısenova.
2016 jyldyń 1 qańtarynda kúshine engen jańa Eńbek kodeksinde Respýblıka kásiporyndarynda eńbek qaýipsizdigi men ony qorǵaýdy basqarýdyń qazirgi zamanǵy júıesin qalyptastyrý maqsat tutylǵan.
2016 jyldyń basynan beri el boıynsha qurylǵan 12 myń 257 óndiristik keńestiń sheshimderi jumys berýshiler úshin mindetti bolyp sanalady.
Óndiristik nysandardaǵy eńbek jaǵdaıyn attestatsııalaýǵa talap kúsheıip, munda synaq zerthanalarynyń mindetti akkredıtatsııasy bolýy qarastyrylǵan.
Jumys berýshilerdi qyzmetterin erikti túrde deklaratsııalaý arqyly yntalandyrý tetikteri kózdelgen.
Mınıstr kásibı táýekelderdi basqarýǵa qatysty tıimdi júıeniń joqtyǵy, eńbek jaǵdaıy boıynsha óndiristik nysandardy attestatsııalaý sapasy, qolǵa alynǵan sharalardyń tıimdiliginiń tómen bolýy jáne jumys berýshilerdiń qyzmetkerlerdiń normatıvtik sanyn saqtamaýy, zııandy jáne qaýipti eńbek jaǵdaıynda jumys isteıtin jumysshylardyń eńbekaqysyn tóleý sekildi birqatar ózekti máselelerdiń sheshimin tabý qajettigin atap ótti.
«Kásibı táýekelderdi basqarýdyń qazirgi zamanǵy júıesin engizgen jón. Bul úshin kásibı táýekelderdi basqarý negizinde eńbek qorǵaý júıesiniń qazirgi ahýalyna baǵa beriledi. Jaqyn aradaǵy 3 jylda bul saladaǵy normatıvtik-quqyqtyq aktiler qaıta súzgiden ótedi.
Zardap shekken jumysshyny áleýmettik qorǵaýda óndiristegi jasyryn oqys oqıǵalardy anyqtaý men táýekelderdi baǵalaý júıesi negizinde nazardaǵy sýbektige bara otyryp, aldyn alý sharalaryn keńeıtý arqyly memlekettik baqylaý tıimdiligi kóteriledi.
Eńbekti qorǵaý salasynda qyzmetterdi avtomattandyrý josparlanýda. Jumys oryndaryndaǵy oqys oqıǵalardyń aldyn alý baǵdarlamalaryn jetildirý men basymdyqty aıqyndaýda shynaıy mazmundaǵy derekterdi jınaý mańyzdy.
Sonymen qatar, áleýmettik seriktestik ınstıtýtyn tıimdi qoldanǵan jón. Eńbek qaýipsizdigi men ony qorǵaý máseleleri, memleket pen jumys berýshiler birlestikteri jáne kásipodaqtar arasyndaǵy ýaǵdalastyq aıasynda, áleýmettik seriktestiktiń barlyq deńgeıinde qamtylatyn bolady», - dedi Tamara Dúısenova.
Eki kúnge boljanǵan konferentsııa barysynda Qazaqstan kásiporyndaryndaǵy eńbek jaǵdaıy jáne ony jaqsartýǵa qatysty qolǵa alynǵan sharalar, QR memlekettik eńbek ınspektsııasy men sanıtarlyq-epıdemıologııalyq qyzmettiń baqylaý-qadaǵalaý tynys-tirshiligi máseleleri talqylanady dep kútilýde.
Sondaı-aq, forýmda, respýblıkanyń jumys berýshileriniń arasynda eńbek qaýipsizdigi men qorǵalýy boıynsha «Senim» baıqaýynyń nátıjesi belgili bolady.
Esterińizge sala keteıik, «KIOSH» kórmesi - ónerkásip qaýipsizdigi salasynda tájirıbe almasý men sońǵy jyldardaǵy jetistikterimen bólisýge arnalǵan Qazaqstandaǵy jalǵyz mamandandyrylǵan alań. Kórmede qurylys, kólik, energetıka, hımııalyq, taý-metallýrgııalyq, munaı-gaz ónerkásibi salalarynda qaýipsizdikti jan-jaqty qamtamasyz etýge arnalǵan ónimder men qyzmetter tolyq usynylǵan.
Jumysshylardyń quqyǵyn qorǵaý, olardyń áleýmettik qorǵalýy men eńbek qaýipsizdigin arttyrý máselelerine nazar aýdarý maqsatynda Halyqaralyq eńbek uıymy 28 sáýirdi Dúnıejúzilik eńbekti qorǵaý kúni etip jarııalaǵany belgili.
