2016 jyly Qazaqstan Óndirýshi salanyń aıqyndyǵy bastamasy standarttaryna sáıkestigin rastaýy tıis
ASTANA. QazAqparat - 2016 jyly Qazaqstan Óndirýshi salanyń aıqyndyǵy bastamasy standarttaryna sáıkestigin rastaýy tıis. Bul týraly búgin KAZENERGY Eýrazııalyq forýmy aıasynda ótken VII Óndirýshi salanyń aıqyndyǵy bastamasy Ulttyq konferentsııada KazEnergy qaýymdastyǵynyń bas dırektory Áset Maǵaýov málim etti.
Óndirýshi salanyń aıqyndyǵy bastamasy (ÓSAB) Iohannesbýrgte turaqty damý boıynsha ótken sammıtte kóterildi jáne oǵan QR Prezıdenti N.Nazarbaev qoldaý bildirdi. QR Úkimeti munaı jáne taý-ken tabysynyń ashyqtyǵyn qamtamasyz etýge baǵyttalǵan atalmysh bastamany júzege asyrý boıynsha mindetteme aldy.
ÓSAB engizýshi elder arasynda Qazaqstan alǵashqy bolyp 2013 jyly mamyrda Halyqaralyq basqarma qabyldaǵan jańa standarttarǵa sáıkes Ulttyq esep daıyndady. 2016 jyly Qazaqstan Óndirýshi salanyń aıqyndyǵy bastamasy standarttaryna sáıkestigin rastaýy tıis.
«ÓSAB júzege asyrý ekonomıkanyń negizgi bólikterine oń áserin beredi jáne ózgelerge úlgi bolýy da ǵajap emes. Ol bastama Qazaqstannyń halyqaralyq bedelin jáne energetıkalyq salanyń ınvestıtsııalyq tartymdylyǵyn arttyrady. Qazaqstan ÓSAB engizý baǵytynda úlken jetistikterge jetti. 2016 jyly ÓSAB standarttaryn qaıta valıdteý baǵytynda Qazaqstan taǵy da óziniń sol standarttarǵa sáıkestiligin rastaýy tıis. Eń mańyzdy isterdiń biri - jergilikti deńgeıde ashyqtyqty qamtamasyz etý, jańa eseptilik talaptaryn qoldaný jáne halyq arasynda ÓSAB tanymaldylyǵyn arttyrý», - dedi Á.Maǵaýov.
Búgingi kúni 48 memleket ÓSAB múshesi bolyp tabylady. Olardyń 31-i bastama standarttaryna sáıkes keletindikterin dáleldedi.
Aıta ketý kerek, ÓSAB aıasynda elder Ulttyq Esep daıyndaıdy. Onda: óndirýshi sala boıynsha kontekstýaldyq aqparattar, bıýdjetke túsetin tabys, jeke menshiktegi memleket úlesi boıynsha dıvıdentter, tasymaldaý boıynsha málimetter, óndirýshi salanyń el ekonomıkasyna qosyp jatqan úlesi týraly aqparattar, áleýmettik ınvestıtsııalar jónindegi derekter keltiriledi.
