2016 jyly qazaq kınoekranynda qandaı jańa týyndylar kórsetiledi?
ASTANA. QazAqparat - Qazaq kıno-teleekrany ótip bara jatqan 2015 jyly tyń dúnıelermen tolǵyp, óz kórermenderine kóptegen jańa týyndylar tartý etti. Solardyń arasynan 2015 jyly bastap túsirilgen, tek 2016 jyly kórsetiletin fılmder týraly toqtalmaqpyz.
Memleketimizdiń tarıhı mártebesin kótergen, Qazaq handyǵynyń 550 jyldyq mereı toıynyń basty tartýlarynyń bir «Qazaq eli» atty 10 serııaly tarıhı kórkem fılm 2016 jyldyń naýryz aıynda kórermen nazaryna usynylady dep kútilýde. Osy týyndynyń prodıýseri Arman Ásenovtiń aıtýynsha, tarıhı serıaldyń bastapqy bıýdjeti 5,5 mlrd. teńge bolǵan. Keıinnen stsenarııdegi qysqartýlardan soń bıýdjeti 2 mlrd. 167 mln. teńge bolyp turaqtanǵan. Jáne qosymsha qarjy kózderinen de aqsha tartylǵan. Onyń sózine qaraǵanda, bul kópserııaly fılmdi birinshi bolyp kórsetýge «Reseı», «ál-Jazıra», «Birinshi arna», «NTV» telearnalary qyzyǵýshylyq tanytqan kórinedi.
Al balalar úshin de 2015 jyldyń basty jańalyǵy Qazaq handyǵy týraly «Qazaq eli» anımatsııalyq fılminiń jasalýy boldy. Bul týyndynyń tusaýkeseri 2016 jyldyń qańtar aıynda «Qazaqstan» telearnasynda ótedi dep kútilýde. Sondaı-aq, anımatsııalyq fılmdi álemdik prokatqa shyǵarý da josparlanyp otyr.
Sondaı-aq, Elbasy Nursultan Ábishuly Nazarbaevtyń ómirinen syr shertetin «Juldyzdar osylaı janǵan edi» (Tak slojılıs zvezdy) dep atalatyn kórkem fılmniń de montajdaý jumystary 2016 jyldyń aqpan aıynda aıaqtalyp, naýryz aıynda kórermen nazaryna usynylmaq.
2015 jyly «Qazaqstan» ulttyq telearnasynyń tapsyrysymen «Jambyl» atty 4 serııaly tarıhı drama túsirilgen bolatyn. Kózi tirisinde-aq aty ańyzǵa aınalǵan, qazaq jyrynyń darabozy, ǵasyrǵa jýyq ǵumyr keshken Jambyl aqynnyń ómir joly men óneri osy kórkem týyndyda sýrettelgen. Tarıhı drama 2016 jyldyń aqpan aıynda, aqynnyń týǵan kúni qarsańynda «Qazaqstan» telearnasynda kórsetilmek. Fılmniń rejısseri - Ánýar Raıbaev, stsenarııin jazǵan - Baqytjan Shormaqov.
Jańa jyldyń basynda telekórermender dostyq, satqyndyq jáne mahabbatqa quralǵan «Shyrǵalań» atty detektıvti dramanyń da kýágeri bolady.
«Shyrǵalań» - búgingi ómir talaptaryna sáıkes, memlekettik organ qyzmetkerleriniń qalyptasýy jáne kásibı ósýi týraly syr shertetin detektıvti kıno janrynda túsirilgen Qazaqstandyq kórkem hıkaıa. Árbir serııasy óz isine úlken jaýapkershilikpen qarap, ózderine senip tapsyrylǵan mindetterdi qaýipsizdik pen kedergige qaramastan adaldyqpen oryndaıtyn memlekettik organ qyzmetkerleriniń beınesin ashady. Hıkaıa keıipkerleri qylmys qurylymynyń shyrǵalańdaryn sheshýge negizdelgen túrli oqıǵalardy bastan keshiredi.
«Shyrǵalań» hıkaıasynyń alǵashqy serııasyn 14 qańtar kúni saǵat 21:05-te «Qazaqstan» telearnasynan tamashalańyzdar.
Sondaı-aq, 2016 jyly kompozıtor Shámshi Qaldaıaqov týraly televızııalyq serıal túsiriledi. Bul týraly «Habar» agenttigi» AQ Basqarma tóraǵasy Aıdos Úkibaı málim etti.
