2016 jyly elordanyń aınalasyna 350 myńnan astam kóshet otyrǵyzylady
ASTANA. QazAqparat - Keler jyly elordanyń «jasyl beldeýi» aýmaǵynda aýdany 291 gektar jerge 353 560 kóshet otyrǵyzylady. Bul týraly elorda ákimdiginiń resmı saıtynan habarlady.
2017-2030 jj. aralyǵynda aǵash egýge jaramdy jalpy aýdany 9 827 gektar jerge jobalardyń tórt kezeńimen (úshinshiden altynshyǵa deıin) aǵash otyrǵyzý josparlanǵan, onyń ishinde 2 792 gektarǵa jabyq tamyr júıesimen 4,1 mln. danadan asa kóshet egiledi. Budan bólek, bıotoptar qurylyp, 1749 gektar jerge shóp ósiriledi.
2012 jyldan 2015 jylǵa deıin birinshi jáne ekinshi kezektegi jobany iske asyrý aıasynda orman alqabynda aýdany 1 032 gektar jerge jabyq tamyr júıesimen 1 493 000 kóshet, sondaı-aq 180 gektar jerge kópjyldyq shóp egildi. Ósimdikterdiń ortasha tamyr alyp ketýi 90%-dy quraıdy.
Búginde «jasyl beldeý» aýmaǵy qoıan, túlki-qarsaqtar, shilder men qyrǵaýyldyń tirshilik etý arealyna aınaldy. 2015 jyly olardy odan ári ósirip, kóbeıtý maqsatynda «jasyl beldeý» aýmaǵyna 4083 qyrǵaýyl jiberildi. Qazirgi kezde torlarda 400 eresek qyrǵaýyl jáne 1500-den astam balapan ósirilip jatyr.
«Jasyl beldeýdiń» aýdany 14,8 myń gektardan artyq, munda 9,7 mln. jýyq aǵash pen 1,9 mln. buta ósedi. Elorda turǵyndary men qonaqtarynyń demalýyna ekologııalyq qolaıly jaǵdaı jasaý úshin qalanyń aınalasynda - «jasyl beldeýdiń» ońtústik-batys bóliginiń 25 gektar aýmaǵynda, sondaı-aq «soltústik tizbek» ýchaskesiniń 100 gektar aýmaǵynda - eki rekreatsııalyq orman-saıabaq aımaǵy jasalady.
