2016 jyly elordada qatty turmystyq qaldyqtar polıgony keńeıtiledi
ASTANA. QazAqparat - Astanada qaldyqtardy basqarýdyń óńirlik baǵdarlamasyn ázirleý jumystary júrgizilýde. Elordanyń qoqys óńdeý kesheni Astana-Pavlodar tas jolynyń altynshy shaqyrymynda ornalasqan. Qatty turmystyq qaldyqtar (QTQ) polıgonynyń 1-shi uıashyǵy aýmaǵynda jınalǵan qaldyqtardyń jalpy kólemi 2,7 mln tonnany quraıdy. Uıashyqtar 2016 jyly ábden tolady dep kútilýde. Qazirgi kezde keler jyly tapsyrylatyn aýdany 15,1 ga ekinshi QTQ polıgonyn salý boıynsha jumystar júrgizilip jatyr, dep habarlady qalalyq ákimdiktiń baspasóz qyzmeti.
Jyl basynan beri Astana qalasynda jınalǵan qaldyq kólemi 516 myń tonnadan asty, sonyń ishinde 356 632 tonnasy - qatty turmystyq qaldyq. 2014 jyly jalpy qaldyq kólemi 570 myń tonnadan artyq bolsa, 2013 jyly 462,7 myń tonnany qurady.
Qazirgi kezde Astanada QTQ jınaý jáne shyǵarý jumystarymen «Astana Tazartý» JShS jáne «Taza Álem-Astana» JShS aınalysady. Kú saıyn qala aýmaǵynan kommýnaldyq qaldyqtardy shyǵarýǵa 85 birlikten astam mamandandyrylǵan tehnıka jumyldyrylady, 800-900 tonna QTQ shyǵarylady.
2012 jyldyń jeltoqsan aıynan bastap qala aýmaǵynan jınalǵan qoqys kólemi «Altyn-TET» JShS qaldyq óńdeý keshenine jetkiziledi. Bul jerde qaldyqtardy suryptaý jáne ekinshi shıkizatqa óńdeý qarastyrylǵan.
Zaýyt jumys istep turǵan kezden beri qaldyq óńdeý keshenine 296 myń tonna QTQ shyǵaryldy, onyń ishinde 115 myń tonna QTQ azaıtyldy, qaıta óńdeýge 30,7 myń tonna shyǵaryldy.
Aıta keteıik, Astana qalasynda qaldyqtardy qaıta óńdeýdi tereńdetýdi arttyrý boıynsha Memleket basshysynyń 2014 jylǵy 25 sáýirdegi tapsyrmasyn oryndaý maqsatynda, sondaı-aq, elordada qaldyq óńdeý salasynyń ınvestıtsııalyq tartymdylyǵyn arttyrý úshin Astana qalasynyń Tabıǵı resýrstar jáne tabıǵat paıdalanýdy retteý basqarmasy qaldyqtardy basqarý jónindegi óńirlik baǵdarlamany ázirlep jatyr. Osylaısha, Astana qalasynda qaldyq óńdeý zaýytyn salý baǵdarlamasyn ázirleý 2016 jyldyń ekinshi toqsanynda ınvestordy anyqtaý jónindegi halyqaralyq konkýrs ótkennen keıin aıaqtaý josparlanǵan.
