2016 jyly elimizde apatty jáne úsh aýysymdaǵy mektepter máselesi tolyq joıylady - BǴM
ASTANA. QazAqparat - 2016 jyly elimizde apatty jáne úsh aýysymdaǵy mektepter máselesi tolyǵymen joıylady. Búgin Májilistiń Áleýmettik-mádenı damý komıtetiniń keńeıtilgen otyrysynda Bilim jáne ǵylym vıtse-mınıstri Esenǵazy Imanǵalıev osylaı málimdedi. Eske sala keteıik, basqosýda bastaýysh bilim berýdiń memlekettik jalpyǵa mindetti standarttary máselesi talqylanǵan bolatyn.
«Búgingi kúni elimizde 7 myńnan astam orta mektep jumys istep tur, olarda 2,5 mln. adamnan astam oqýshy bilim alýda. Al oqýshy ornynyń tapshylyǵy 70 myń 982-ni quraıdy. Júrgizilgen monıtorıngke súıensek, oqýshy ornynyń tapshylyǵyn joıý úshin respýblıka boıynsha 149 mektep salý kerek. Osyǵan oraı, mınıstrlik 2014-2016 jyldarǵa arnalǵan úsh aýysymdy mektepter problemasyn sheshýge baǵyttalǵan jospar ázirlengen bolatyn. Osy josparǵa sáıkes, 2016 jyly elimizdegi barlyq úsh aýysymdaǵy jáne apatty mektepter máselesi tolyq sheshimin tabatyn bolady», - dedi vıtse-mınıstr Esenǵazy Imanǵalıev.
Onyń aıtýynsha, atalmysh jospardy Ulttyq ekonomıka mınıstrligi de qoldaǵan.
