2016 jyly ajal qushqan mıgranttar sany rekordtyq deńgeıge jetti
ASTANA. QazAqparat - Bıylǵy jyly álem boıynsha 7 myńnan astam mıgrant túrli jaǵdaılarda mert bolǵan. Arnaıy júrgizilgen zertteýler boıynsha bul rekordtyq deńgeıdegi kórsetkish bolyp otyr. Bul týraly Mıgratsııa jónindegi halyqaralyq uıym ókilderiniń esebinen belgili boldy, dep jazady korrespondent.net.
Atalmysh ınternet-basylym taratqan derekter boıynsha, 2016 jyly kóship-qoný barysynda 7189 adam mert bolyp, birqatary iz-tússiz joǵalyp ketken. Bul rette 4812 adamnyń Jerorta teńizinde sýǵa ketip nemese joǵalyp ketkendigi belgili bolyp otyr.
Zertteýshiler qurban bolǵan mıgranttar sanynyń artýy múmkindigin de joqqa shyǵarmaıdy.
Jerorta teńizi arqyly Eýropa elderine barlyǵy bıylǵy jyly 357249 adam kelgen. Kóship-qonýshylardy qabyldaý jaǵynan Gretsııa kósh bastap otyr. Bul elge barlyǵy 170 myń bosqyn qonystanǵan.
Eýropa qazirgi tańda Ekinshi dúnıejúzilik soǵystan keıingi eń úlken mıgratsııalyq daǵdarysty bastan ótkerýde. Jaǵdaıdyń bulaısha qalyptasýyna Taıaý Shyǵys pen Soltústik Afrıka elderindegi qarýly qaqtyǵystar men ekonomıkalyq problemalar sebep bolyp otyr.
EO Frontex shekaralyq agenttiginiń málimetteri boıynsha, 2015 jyly eýroodaqqa 1,8 mln kóship-qonýshy kelgen.
