2016 jyly avtonesıelerdi jeńildikpen berýge 10 mlrd. teńge bólinedi - M.Pishembaev

ASTANA. QazAqparat - 2016 jyly avtonesıelerdi jeńildikpen berýge 10 mlrd. teńge bólinedi. Bul týraly búgin Ortalyq kommýnıkatsııalar qyzmetinde ótken baspasóz máslıhatynda «Qazaqstan mashına jasaýshylar odaǵy» ZTB basqarma tóraǵasy, QR Parlamenti májilisiniń depýtaty Meıram Pishembaev málim etti.

«Ekonomıkadaǵy qıynshylyqtar bizdiń salaǵa da áser etti. Eger de jyl basynda Elbasynyń tapsyrmasymen Úkimet mashına jasaý salasyna qoldaý jasamaǵan bolsa, óndiris salasynda tipti jaǵdaı qıyndaý bolýshy edi. Biraq Úkimettiń qoldaýymen jaqsy kómek jasaldy. Birinshiden, avtomobıl ónerkásibine jeke azamattar úshin jeńildetilgen nesıege 10 mlrd. teńge Úkimetten bólindi. Mashına jasaý salasyndaǵy ónimderdi satyp alýǵa múmkinshilikter jasaldy. Ol jeke tulǵalalarǵa, al zańdy tulǵalarǵa lızıng úshin 5 mlrd. teńge bólindi. Bul azdap ekonomıkany jandandyrdy. Osyna eskere otyryp, kelesi jyly taǵy da 10 mlrd. teńge bólý kózdelip otyr. Ol óte jaqsy kómek bolmaq», - dep atap ótti M.Pishembaev. Depýtattyń aıtýyna qaraǵanda, bolashaqta mashına jasaý ónerkásibinde óndiristik tehnologııalardy jańǵyrtý boıynsha baǵdarlama jasaqtalady. «Onyń ústine bizdiń mashına jasaý salamyzdy óndiris jaǵynan jandandyrý úshin, kásiporyndardaǵy tehnologııalardy jańartý boıynsha baǵdarlamany jasaqtaýdy usyndyq. Úkimet ony qoldap otyr. Jaqyn arada sol máseleni keńinen qarap, zaýyttardyń barlyǵyn jańǵyrtýdan ótkizip, suranysqa qabiletti jańa ónimder shyǵarýǵa múmkinshilikter jasaý kerekpiz» - dedi ol.