2016 jyly Astananyń jeke tabysy 180 mlrd. teńgege jýyq bolady
ASTANA. QazAqparat - Keler jyly elordanyń jeke tabysy 180 mlrd. teńgege jýyq bolady. Bul týraly ákimdiktiń resmı saıtynda habarlady.
Memlekettik qarjy qurylysqa, jol men áleýmettik mańyzy bar nysandardy ustaýǵa, áleýmettik kómekti qamtamasyz etýge, sondaı-aq smart-jobalardy engizýge bólinedi. Ekonomıka jáne bıýdjetti josparlaý basqarmasy basshysynyń orynbasary Gúlnar Júsipova qalalyq máslıhat depýtattaryna 2016 jylǵa arnalǵan memlekettik bıýdjetti úlestirý týraly aıtyp berdi.
Osylaısha, elordalyq Sáýlet jáne qala qurylysy basqarmasyna bes bıýdjettik baǵdarlamany júzege asyrý úshin qarjy bólinbek. Jergilikti bıýdjet jobasyna «Bıznestiń jol kartasy - 2020» baǵdarlamasyn iske asyrýǵa, elordada ınnovatsııalyq qyzmetti qamtamasyz etýge jáne damytýǵa, sondaı-aq halyqaralyq EKSPO-2017 kórmesine daıyndyq jáne ony ótkizýge jumsalatyn shyǵyndar engizildi. Budan bólek, elordada Astana qalasynyń Seriktestik baǵdarlamasy qolǵa alynatyn bolady.
Sonymen qatar, 2016 jyldyń bıýdjetinde aýdandyq ákimdikter júzege asyratyn on bıýdjettik baǵdarlamany qarjylandyrýǵa arnalǵan qarjy eskerilgen. Ol muqtaj azamattarǵa áleýmettik kómek kórsetýge jumsalady. Sondaı-aq, eldi mekenderdi abattandyrý men kógaldandyrýǵa arnalǵan shyǵyndar da qarastyrylǵan.
Bıýdjettik qarjynyń bir bóligi memlekettik organdardy ustaýǵa jáne kúrdeli jóndeýge, qalalyq Qazaqstan halqy Assambleıasynyń jumysyn qamtamasyz etýge jumsalady. Aldaǵy jyly №82 «Juldyz», №12 «Qarlyǵash», №5 «Aqbota», №11 «Gaýhar» jáne №14 «Aqbópe» balabaqshalaryn jóndeý kózdelgen.
