2016 jyly Ábý-Dabıdiń óz ǵarysh aılaǵy bolady
ASTANA. QazAqparat -Birikken Arab Ámirligindegi (BAÁ) ǵarysh aılaǵynyń qurylysy 2016 jyly aıaqtalýy tıis, dep jazdy National gazeti.
Basylymnyń derekterinshe, aımaqtaǵy alǵashqy ǵarysh aılaǵy Ábý-Dabı ámirliginde bolmaq. Alań qurylysyna amerıkandyq Virgin Galactic pen ámirliktiń Aabar Investments kompanııalary atsalysatyn bolady.
Basylym atap ótkendeı, ǵarysh alańy ashylmas buryn BAÁ azamaty ǵaryshqa ushpaq. Elde jaqyn arada bastalatyn baıqaýdyń jeńimpazy quny $250 000 bolatyn bıletke jáne Virgin kompanııasynyń alǵashqy jeke ǵarysh komandasymen jer mańyndaǵy orbıtaǵa ushý múmkindigine ıe bolady.
Ámirliktiń Aabar Investments kompanııasy Virgin Galactic jeke ǵarysh kompanııasynyń 37,8% aktsııasyna ıe. Ol bul jobany júzege asyrý úshin $300 mln. astam qarjy quıdy. Alǵashqy ǵarysh kemesi Nıý-Mehıko shtatynan aǵymdaǵy jyldyń jeltoqsanynda ushady. Qarapaıym qyzmet paketine bes mınýttyq salmaqsyzdyq kúıi men Jerdi 1,6 myń shaqyrym bıiktikten kórý múmkindigi enedi, dep habarlady ITAR-TASS.
