2016 jyly 60-tan astam qazaqstandyq ıis tıip ýlanyp qaıtys boldy
ASTANA. QazAqparat - 2016 jyly 66 adam ıis tıip ýlanyp kóz jumǵan. QR ІІM TJ Komıtetiniń resmı ókili Rýslan Imanqulovtyń habarlaýynsha, 2016 jyldyń 11 aıy ishinde pesh jaǵyp jylytý aqaýynan respýblıka boıynsha 1088 adam zardap shekti, onyń 342-si balalar. Sonymen birge, 66 adam qaıtys boldy, onyń 10-y balalar.
Tótenshe jaǵdaılar respýblıkanyń barlyq derlik aýmaǵynda bolǵan. Saraptamanyń kórsetýinshe, ıis tıip mert bolǵandardyń basym bóligi Ońtústik Qazaqstan, Almaty, Jambyl jáne Shyǵys Qazaqstan óńirleriniń turǵyndary. Negizgi sebepter - pesh qurylysyndaǵy jaryqshaqtar; tazartylmaǵan tútindikti, aqaýy bar pesh qurylǵysyn qoldaný. Odan bólek, qarapaıym umytshaqtyqtyń saldary qaıǵyly jaǵdaıǵa ákep soǵady - tutynýshylar tútindiktiń japqyshyn ashýdy, peshti der kezinde tazalaýdy umytyp ketedi, tútinniń qalaı shyǵyp jatqanyn da teksermeıdi nemese pesh jaǵýdy balalarǵa senip tapsyrady.
Atalǵan qaıǵyly jaıttardyń aldyn alý úshin turǵyn úı sektorlarynda túsindirme jumystary júrgizilip, jadnamalar taratylýda. Alaıda, osyǵan qaramastan azamattardyń barlyǵy maman keńesterine qulaq aspaýda. TJ Komıteti túngi ýaqytta gaz qurylǵysy men jylytý peshteri ornatylǵan bólmeniń terezesin ashyp qoıýǵa jáne onda uıyqtamaýǵa keńes beredi.
QR ІІM Tótenshe jaǵdaılar komıteti «QazTransGaz» AQ gaz jáne gazben jabdyqtaý salasyndaǵy ulttyq operatormen birlesip, ıis gazynan ýlanýdyń aldyn alýǵa baǵyttalǵan áleýmettik beınerolık túsirdi. Áleýmettik beınerolık ıdeıasy - ıis gazynyń qaýiptiligine halyqtyń nazaryn aýdarý.
