2016 jylǵy Jer komıssııasynyń sheshimderi áli kúnge tolyq oryndalmaǵan

NUR-SULTAN. QazAqparat – Jer reformasy jónindegi 2016 jylǵy komısııanyń qabyldaǵan sheshimderi áli oryndalmaǵan nemese sapasyz oryndalǵan. Komıssııanyń búgingi otyrysynda osyndaı másele aıtyldy, dep habarlaıdy QazAqparat tilshisi.

Komıssııanyń ekonomıkalyq máseleler jónindegi jumys tobyn basqaratyn Aqylbek Kúrishbaev tıisti mınıstrlikterden bul jolǵy komıssııa otyrystarynda qabyldanatyn sheshimderge muqııat qaraýdy surady.

«Komıssııa músheleriniń nazaryna ekonomıkalyq máseleler jónindegi jumys tobynyń otyrysynda talqylanǵan uıymdastyrý jumystarynyń problemalaryn jetkizgim keledi. Birinshiden, qazir biz qyzý talqylap jatqan birqatar suraq 2016 jyly jer reformasy jónindegi aldyńǵy komıssııanyń jumysy sheńberinde qaralyp, sol kezdiń ózinde tıisti sheshimder qabyldanǵan bolatyn. Biraq búgingi kórip otyrǵanymyzdaı, olar áli oryndalmaǵan nemese sapasyz oryndalǵan deńgeıde qalyp otyr. Sondyqtan memlekettik organdardyń jer komıssııasy tarapynan beriletin usynystardy bul joly qalaı oryndaıtyny bizdiń qatty alańdatady. Atalǵan máselelerge osy jınalysqa qatysyp otyrǵan mınıstrlikterdiń ókilderi nazar aýdarýy qajet dep esepteımiz. Eger biz birneshe jyldan keıin qaıtadan jańa komıssııa quryp, «baıaǵy jartas sol jartas» dep qaıtadan osy suraqtarǵa oralsaq, búgingi qabyldanǵan sheshimderdiń qandaı mańyzy bolmaq», - dedi jumys komıssııa múshesi.

Atalmysh sharada Aqylbek Kúrishbaev halyqqa jaıylymdyq jer berýde bıýrokratııa óte kóp ekenin aıtqan bolatyn.

Osy aptada Májilis jerdi sheteldikterge berýge birjola tyıym salýdy kózdeıtin zań jobasyn maquldady.

Prezıdenttiń kómekshisi Erlan Qarın osy zań jobasynyń maquldanýy týraly pikir bildirgenin jazǵan bolatynbyz.