2016 jylǵy tamyzda biriktirilgen Salyq jáne Keden kodeksiniń jobasy Parlamentke engiziledi - E.Dosaev

ASTANA. QazAqparat - Barlyq jergilikti ınvestıtsııalyq jobalardy qarjylandyrý 2017 jyldan bastap tolyqtaı jergilikti deńgeıge berilmek. Bul týraly búgin Úkimet otyrysynda QR Ulttyq ekonomıka mınıstri Erbolat Dosaev málim etti.

«Bıýdjetten kúrdeli shyǵyndardy qarjylandyrýdyń servıstik modelin qoldaný múmkindigi úshin 2016 jylǵy naýryzǵa deıin úlgilik servıstik kelisimshart ázirlenetin bolady. Sonymen qatar jalpy sıpattaǵy transfertter týraly zań jobasyn ázirleý kezinde respýblıkalyq bıýdjetten bólinetin nysanaly transfertter esebinen barlyq jergilikti ınvestıtsııalyq jobalardy qarjylandyrý 2017 jyldan bastap tolyqtaı jergilikti deńgeıge beriletin bolady»,- dedi E.Dosaev. Munymen qosa, mınıstr salyq júıesin túbegeıli reformalaý maqsatynda Ulttyq ekonomıka mınıstrligi men Qarjy mınıstrligi 2016 jylǵy tamyzda QQS-ynyń ornyna satýdan túsetin salyqty engizýdi, salyq rejimderin úsh deńgeıge deıin ońtaılandyrýdy, tıimsiz salyqtyq jeńildikterdi joıýdy, sondaı-aq salyq salasynyń ashyqtyǵy men salyqty ákimshilendirý tıimdiligin arttyrýdy kózdeıtin biriktirilgen Salyq jáne Keden kodeksiniń jobasyn Parlamentke engizetin bolady.