2016 jylǵy saıahat úshin eń arzan elder ataldy
ASTANA. QazAqparat - 2016 jylǵy saıahat úshin eń arzan elder Úndistan men Indonezııa dep tanyldy. Bul týraly Skyscanner týrıstik qyzmetiniń zertteýine silteme jasap reseılik BAQ habarlady.
Tizimdi jasaý barysynda eki adamnyń bir táýlikte turýy, tamaqtanýy jáne kólikke jumsalatyn aqshasyn saraptaý qorytyndysy negizge alyndy.
Úndistan men Indonezııadaǵy bir kúndik saparyna jup ortasha alǵanda 40 dollar jumsaıdy. Avtorlar atap ótkendeı, únemshil týrıster úshin Úndistanda táýligine 20 dollar da jetkilikti bolýy múmkin.
Nepal men Vetnamdy bir kún aralaýǵa 45 dollar ketedi. Laosta 55 dollar, al Shrı-Lankada 60 dollar jumsalady.
Tizimdi qurastyrýshylar Reseıge kórshiles elderde de arzan demalýǵa bolatynyn aıtty. Máselen, Abhazııada bir táýlikte 65 dollar, Armenııada 70, al Grýzııada 80 dollar jumsalatyn kórinedi.
Eýropalyq elderdiń ishinde qalta kótererlik elder bolyp Serbııa, Bolgarııa, Chernogorııa, Rýmynııa jáne Vengrııa sanalady. Munda táýligine shamamen 70-ten 85 dollarǵa deıin aqsha kerek.
Reıtıngti qurastyrǵanda ushaqpen ushýǵa tólenetin aqsha eseptelmedi, dep jazdy TASS.
Foto: Andreı Stepın
