2016 jylǵy sáýirde bazalyq paıyzdyq mólsherlemeni ıkemdi ózgertý tetigi engiziledi - E.Dosaev

ASTANA. QazAqparat - Inflıatsııa 2019 jyly 4-6%-ǵa deıin jáne 2020 jyly 3-4%-ǵa deıin tómendetiledi. Búgin Úkimet otyrysynda Elbasynyń Joldaýyn júzege asyrýdyń Jalpyulttyq is-sharalar josparyn tanystyrý kezinde QR Ulttyq ekonomıka mınıstri Erbolat Dosaev osylaı málim etti.

Memleket basshysynyń tapsyrmalaryna sáıkes, jańa qurylymdyq ekonomıkany qalyptastyrý úshin birqatar sharalar kózdelip otyrǵanyna toqtalǵan mınıstr: «Birinshi baǵyt qarjy sektoryn turaqtandyrýǵa qatysty. Bul turǵyda Úkimet pen Ulttyq banktiń orta merzimdi perspektıvadaǵy negizgi maqsaty ınflıatsııany 2016-2017 jyldary 6-8%-ǵa deıin, 2018 jyly 5-7%-ǵa deıin, 2019 jyly 4-6%-ǵa deıin jáne 2020 jyly 3-4%-ǵa deıin tómendetý bolyp tabylady», - dedi. Onyń sózine qaraǵanda, 2016 jylǵy sáýirde bazalyq paıyzdyq mólsherlemeni ıkemdi ózgertý tetigi engiziletin bolady, ol baǵa turaqtylyǵyn qamtamasyz etýge jáne ınflıatsııa deńgeıin tómendetýge baǵyttalady. Bul aqsha-kredıt saıasaty operatsııalarynyń tıimdiligin arttyrýǵa jáne onyń aqsha naryǵynyń mólsherlemelerine yqpalyn kúsheıtýge múmkindik beredi. Budan bólek, jumys istemeıtin kredıtter turǵysynan bank sektorynyń barlyq sýbektilerine júrgizilgen stress-testileýdiń nátıjeleri boıynsha qarjy sektorynyń turaqtylyǵyn qamtamasyz etý úshin 2016 jylǵy qyrkúıekke deıin olardy moıyndaý jáne esepten shyǵarý jónindegi sharalar qabyldanatyn bolady.