2016 jylǵy «Altyn dombyra» ıegeri Muhtar Nııazovqa aýyldastary aq boz at mingizdi
QYZYLORDA. QazAqparat-Aıtystyń aqtuıǵyny, «Altyn dombyranyń» eki márte ıegeri Muhtar Nııazov jankúıeri bolǵan syrboıylyqtarmen kezdesý saparyn kindik qany tamǵan jeri - Jalaǵash aýdany Aqjarma aýylynan bastady.
Bul týraly «QazAqparat» HAA tilshisi habarlady.
Aqyndy saltanatty jaǵdaıda kútip alǵan týǵan aýyly, ony sahna tórine shyǵaryp, laıyqty qurmet kórsetti. Sharany júrgizgen ustazy, aqyn Mamyr Baıdáýletov qasıet qonǵan Aqaryq aýylynyń tarıhy men Muhtardaı altyn ul shyqqan áýlet jaıynda keńinen áńgime órbitti.
Sharaǵa oblystyq jastar ortalyǵynan, aýdan basshylyǵynan ókilder arnaıy qatysyp, aq lebizderin bildirse, aǵasy ári ustazy, jýrnalıst, belgili aqyn Dúısenbek Aıashuly keshegi bala Muhtardy sýretteı syr shertti. Sonymen qatar, talantty ánshi, jyrshy Marat Súgir ónerin ortaǵa salyp, aýyldyń ájeler ansambli ásem ánnen shashý shashty.
Shara sońynda aýyl turǵyndary Syr óńiriniń, jalpy qany qazaqtyń atyn shyǵaryp júrgen uldaryna aq boz at mingizip, shyǵaryp saldy.
Muhtar Nııazov erteńnen bastap Aral, Qazaly, Qarmaqshy, Jalaǵash, Syrdarııa, Shıeli, Tereńózek aýdandaryn aralap, elmen júzdespek.
Eske salaıyq, 2016 jyldyń 3-4 jeltoqsany kúnderi Almatyda «Altyn dombyra» dástúrli alaman aıtysy ótip, qyzylordalyq aıtysker aqyn Muhtar Nııazov onyń bas júldesin jeńip alǵan bolatyn. Bul qurmetti ataqqa ol 2012 jyly da qol jetkizgen edi. Araǵa tórt jyl salyp, ekinshi márte «Altyn dombyra» ıegeri atandy.
