2016 jylǵy 1 naýryzǵa deıin jańa Bilim jáne ǵylymdy damytýdyń memlekettik baǵdarlamasynyń jobasy ázirlenedi
ASTANA. QazAqparat - Jyldyń sońyna deıin 2016-2019 jyldarǵa arnalǵan Densaýlyq saqtaýdy damytýdyń memlekettik baǵdarlamasynyń jobasy ázirlenedi. Bul týraly búgin Úkimet otyrysynda QR Ulttyq ekonomıka mınıstri Erbolat Dosaev málim etti.
«Memleket basshysy Qazaqstan halqyna Joldaýynda atap ótken jańa áleýmettik saıasat sheńberinde: áleýmettik qamtamasyz etý júıesin ońtaılandyrý, áleýmettik ataýly kómektiń jańa formatyn engizý tájirıbesin keńeıtý, eń tómengi kúnkóris deńgeıiniń shamasyn aıqyndaý ádisnamasyn ózgertý, sondaı-aq azyq-túlik sebetiniń quramyn jáne tamaq ónimderin tutynýdyń eń tómengi normalaryn qaıta qaraý maqsatynda 2030 jylǵa deıin áleýmettik damý Tujyrymdamasy ózektilendiriletin bolady», - dedi E. Dosaev.
Onyń aıtýynsha, aǵymdaǵy jyldyń sońyna deıin 2016-2019 jyldarǵa arnalǵan Densaýlyq saqtaýdy damytýdyń memlekettik baǵdarlamasy, 2016 jylǵy 1 naýryzǵa deıin jańa Bilim jáne ǵylymdy damytýdyń memlekettik baǵdarlamasynyń jobasy ázirlenedi.
Sonymen qatar mınıstr 2017 jyldan bastap bilim berý salasynda «Barshaǵa arnalǵan kásiptik-tehnıkalyq tegin bilim» týraly jańa jobany iske asyrý bastalatynyn atap ótti.
