2016 jylǵy 1 qańtardan bastap travmatıkalyq qarýdy zańsyz alyp júrgen azamattarǵa qylmystyq jaýapkershilikke tartylady - ІІM
ASTANA. QazAqparat - Aǵymdaǵy jylǵy 10 jeltoqsandaǵy jaǵdaı boıynsha respýblıka boıynsha azamattar erikti túrde jalpy somasy 2 mlrd. 164 mln. teńge bolatyn 42 239 birlik travmatıkalyq qarý tapsyrǵan. Bul týraly QR Іshki ister mınıstrliginiń taratqan Úndeýinde jarııalanyp otyr.
Mınıstrliktiń málimetine qaraǵanda, travmatıkalyq qarýdy (jaraqat salatyn patrondarmen atý múmkindigi bar uńǵysyz jáne gazdy atys qarýyn) azamattyq aınalymda tyıym salýǵa baılanysty ishki ister organdary 2015 jylǵy 1 qańtardan bastap travmatıkalyq qarýdy saqtaýǵa jáne alyp júrýge ishki ister organdarynyń ruqsaty bar jeke tulǵalardan satyp alý boıynsha jumys júrgizýde. Al erikti túrde tapsyrylǵan travmatıkalyq qarýdy qabyldaýdy 2016 jylǵy 1 qańtarǵa deıin júzege asyratyn bolady. Osyǵan baılanysty, Іshki ister mınıstrligi Qazaqstan Respýblıkasynyń travmatıkalyq qarýdy saqtaýǵa jáne alyp júrýge ruqsaty bar azamattaryna kórsetilgen merzimge deıin (2016 jylǵy 1 qańtarǵa deıin) ony erikti túrde ótemdi tapsyrý týraly úndeý jarııalady.
«2016 jylǵy 1 qańtardan bastap Qylmystyq kodekstiń 287-babynyń 2-bóligine sáıkes travmatıkalyq qarýdy zańsyz ıemdengeni, bergeni, ótkizgeni, saqtaǵany, tasymaldaǵany nemese alyp júrgeni úshin azamattardyń qylmystyq jaýapkershiligi kózdelgen. Bul rette zańnamany buzǵandar 2000 aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne bir jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady. Sonymen qatar, Іshki ister organdarynda travmatıkalyq qarý ıesi retinde esepte turǵan jáne olardy 2016 jylǵy 1 qańtarǵa deıin tapsyrmaǵan azamattar turǵylyqty jáne tirkelgen mekenjaılary boıynsha tekseriledi», delingen Úndeýde.
