2016 jylǵa qaraı oqýshylardyń 50 paıyzy qosymsha bilim berý júıesimen qamtylýy tıis - B.Jumaǵulov
ASTANA. 11 qyrkúıek. QazAqparat - 2016 jylǵa qaraı oqýshylardyń 50 paıyzy qosymsha bilim berý júıesimen qamtylýy tıis.
Bul týraly búgin Úkimet otyrysynda «Oqýshylardyń fýnktsıonaldy saýattylyǵyn damytý jónindegi 2012-2016 jyldarǵa arnalǵan Ulttyq is-qımyl josparynyń oryndalý barysy týraly» baıandama jasaǵan QR Bilim jáne ǵylym mınıstri Baqytjan Jumaǵulov aıtty.
Onyń sózine qaraǵanda ulttyq josparda oqýshylar saraıy, mýzyka mektepteri, jas tehnıkter men natýralıster stansylary jumystaryn túbegeıli ózgertý qarastyrylǵan. El tarıhynda alǵash ret atalǵan uıymdardyń materıaldyq-tehnıkalyq bazasy jańartylady.
«Oqytýdyń jańa tehnologııalary men ınteraktıvtik, ınnovatsııalyq formalary engiziletin bolady. Qazirdiń ózinde jas tehnıkter men natýralısterge jáne basqa ta sanattarǵa arnalǵan balalardyń tanymdyq jýrnaldary shyǵa bastady. Osynyń barlyǵy tulǵanyń kásibı turǵyda ózin-ózi anyqtaýyna múmkindik beredi. Oqýshylardyń boıynda shyǵarmashylyq jáne ınnovatsııalyq qyzmetke degen qajettilikti qalyptastyrýǵa yqpal etedi», - dedi B.Jumaǵulov.
Sondyqtan da mınıstrdiń paıymynsha, oǵan aımaqtarda ákimdikter barynsha qoldaý kórsetýi tıis. Sebebi, qazirgi ýaqytta elimizde oqýshylardyń qosymsha bilimmen qamtylýy nebári 21 paıyzdy ǵana quraıdy. «2016 jyly qamtýdy 50 paıyzǵa jetkizý qajet. Osyǵan baılanysty aımaqtarda qosymsha bilimmen qamtýdy arttyrý boıynsha naqty usynystar ázirlenýi tıis», - dedi ol.
