2016 jylǵa qaraı Qazaqstan óńirdiń saýda, logıstıkalyq jáne iskerlik ortalyǵyna aınalýy tıis - N.Nazarbaev
ASTANA. 17 sáýir. QazAqparat /Marlan Jıembaı/ - 2016 jylǵa qaraı Qazaqstan óńirdiń saýda, logıstıkalyq jáne iskerlik ortalyǵyna aınalýy tıis. Bul tapsyrmany Memleket basshysy Nursultan Nazarbaev búgin QR Úkimetiniń keńeıtilgen májilisinde berdi.
Respýblıka joldarynda tranzıttik jáne ishki júkterge qalaı tekserý júrgiziletindigin synǵa alǵan Elbasy: «Óskemen avtozaýytynyń mashınasy tıelgen kólik Astanaǵa 10, sátti jaǵdaıda aptada jetedi. Men joldan ba, dep suraımyn? Joq, jol jaqsy, al kim ákele jatyr, qalaı ákele jatqandyǵyn teksergisi keletinder kóp. Bul nelikten jasalatyny túsinikti», - dedi.
Memleket basshysynyń paıymdaýynsha, ishki ónimimizdi tasymaldaý osyndaı kedergige dýshar bolyp otyrǵanda, transshekaralyq júkterdi tasymaldaý jaǵdaıy týraly áńgime qozǵaýdyń ózi orynsyz. «Buǵan qandaı sheteldik ınvestor shydaıdy?», - dedi N.Nazarbaev.
Elbasynyń atap ótýinshe, Eýropa men Azııa arasyndaǵy kópir bolyp tabylatyn elimiz arqyly júk tasymaldaý bıýdjetke jáne memleketke mol kiris ákeledi.
«Biz jemqorlyqtan ada, qaýipsiz jáne jaıly jańa Jibek jolyn qurýymyz kerek. 2016 jylǵa qaraı Qazaqstan óńirdiń saýda, logıstıkalyq jáne iskerlik ortalyǵyna aınalýy tıis. Bul ındýstrııalyq-ınnovatsııalyq baǵdarlamanyń mańyzdy bólikteriniń biri», - dedi Memleket basshysy.
