2016 jylǵa deıin 30-ǵa jýyq aýrýhana salynady - QR DSM
ASTANA. QazAqparat - «100 mektep, 100 aýrýhana qurylysy» jobasy boıynsha 28 nysan qurylysyn 2016 jyldyń sońyna deıin iske asyrý kózdelgen, dep habarlaıdy QR Densaýlyq saqtaý vıtse-mınıstri Bolat Tókejanov.
QR Premer-Mınıstriniń orynbasary G.Ábdiqalyqovanyń tóraǵalyǵymen selektorlyq rejımde ótken QR Úkimeti janyndaǵy Densaýlyqty saqtaý jónindegi ulttyq úılestirý keńesiniń (UÚK) HHІІ otyrysynda ol «100 mektep, 100 aýrýhana qurylysy» jobasy boıynsha 71 nysan qurylysy aıaqtalǵanyn jetkizdi. 28 nysan qurylysy (22 nysan - respýblıkalyq bıýdjet esebinen, 6 nysan - memlekettik-jekemenshik seriktestik tetigi arqyly) 2016 jyldyń sońyna deıin iske asyrý kózdelgen.
«350 dárigerlik ambýlatorııa, feldsherlik-akýsherlik pýnkt jáne emhana qurylysy» jobasy boıynsha 103 nysan qurylysy aıaqtalyp, iske qosyldy. 242 nysan qurylysyn (99 nysan - respýblıkalyq bıýdjet esebinen, 126 nysan - jergilikti bıýdjet esebinen, 17 nysan - memlekettik-jekemenshik seriktestik tetigi boıynsha) 2016 jyldyń sońyna deıin iske asyrý josparlanyp otyr.
Ulttyq úılestirý keńesi oblystardyń, Astana jáne Almaty qalalarynyń ákimderine 2014 jyly iske qosý josparlanǵan densaýlyq saqtaý nysandaryn ýaqytyly paıdalanýǵa berý, dárigerlik ambýlatorııalar men feldsherlik-akýsherlik pýnkter qurylysyna jergilikti bıýdjetten ýaqytyly qarjy bólý boıynsha naqty sharalar qabyldaýdy tapsyrdy.
Densaýlyq saqtaý mınıstrligine respýblıkalyq bıýdjetten bólingen qarajat ıgerilmegen jaǵdaıda onyń kólemin qysqartý nemese basqa basymdy baǵyttarǵa jumsaý tapsyryldy.
QR Óńirlik damý mınıstrligine jobalyq-smetalyq qujattarǵa sapaly saraptama jasaý boıynsha sharalar qabyldaý júkteldi.
