2016 jyldyń sońyna deıin Astananyń 65 mektebi jaryqdıodtyq jaryqtandyrýǵa kóshiriledi
ASTANA. QazAqparat - 2016 jyldyń sońyna deıin Astananyń 65 mektebi jaryqdıodtyq jaryqtandyrýǵa kóshiriledi. Bul týraly búgin Astanada ótip jatqan «Energııalyq tıimdi jaryqtandyrý: Qazaqstannyń jaryqtyq-tehnıkalyq salasynyń problemalary men perspektıvalary» atty halyqaralyq konferentsııada QR Investıtsııalar jáne damý mınıstrliginiń Indýstrııaldyq damý jáne ónerkásiptik qaýipsizdik komıtetiniń tóraǵa orynbasary Maqsut Ordabaev aıtty.
«Elimizde qyzatyn lampalardy paıdalanýǵa zań júzinde shekteý qoıylǵandyqtan, energııalyq tıimdi jaryqtandyrýmen qamtamasyz etýge arnalǵan jumystar jedel júrgizilýde. Bıýdjettik mekemeler jaryqdıodtyq jaryqtandyrýǵa kóshiriledi. Máselen, qazirde Astananyń 11 mektebi tolyǵymen osyndaı jaryq berý túrine kóshirilgen. 2016 jyldyń sońyna deıin 65 mektepti qamtý josparlanyp otyr», - dep atap ótti ol. Sonymen qatar tóraǵa orynbasary Almatydaǵy energııalyq tıimdi jaryqtandyrýǵa kóshý tájirıbelerin alǵa tartty. «Kóshe jaryǵyn jetildirý maqsatynda Almaty qalasynyń ákimidigi men Eýropalyq qalpyna keltirý jáne damý banki arasynda 34 mln. dollarlyq kelisimge qol qoıylǵan. Bul qarajatqa qalanyń barlyq kóshelerin energııa únemdeıtin lampalarmen qamtamasyz etip, dıspetcherlik pýnkt qurý josparlanǵan», - dedi M.Ordabaev. Sheneýniktiń keltirgen málimeti boıynsha, elimizde kóshedegi jáne ǵımarat ishindegi jaryqty energııa únemdeýshi lampalarmen almastyrýdyń arqasynda bir jyl ishinde 150 mln. kVt/saǵat elektr energııasy únemdelgen. Aıta keteıik, konferentsııa barysynda kórshi elderdiń elektr únemdeýshi jaryqty paıdalanýdaǵy tájirıbesi talqylanyp, júrgizilgen zertteýlerdiń qorytyndylary qarastyryldy. Sondaı-aq quramynda synaby bar paıdalanylǵan lampalardy qorshaǵan ortaǵa zııanyn tıgizbeı joıý joldary sóz boldy. Sharaǵa QR Parlamentiniń depýtattary, memlekettik organdardyń ókilderi, Qazaqstannyń isker jáne ǵylymı ortalarynyń mamandary, sonymen qatar Reseı, Belarýs jáne Armenııanyń energııa únemdeý salasyndaǵy sarapshylary qatysty.
