2016 jyldyń qyrkúıeginde Qazaqstanda memlekettik organdarǵa tán emes qyzmetterdi básekelestik ortaǵa berýge daıyndyq jumystary aıaqtalady

ASTANA. QazAqparat - 2016 jyldyń qyrkúıeginde Qazaqstanda memlekettik organdarǵa tán emes qyzmetterdi básekelestik ortaǵa berýge daıyndyq jumystary aıaqtalady. Bul týraly búgin QR Parlamenti Májilisi Ekonomıkalyq reforma jáne óńirlik damý komıtetiniń keńeıtilgen otyrysynda Ulttyq ekonomıka birinshi vıtse-mınıstri Marat Qusaıynov málim etti.

«Tolyqtaı alǵanda, memlekettik organdardyń qyzmetin básekelestik ortaǵa berý kelesi algorıtmmen usynylady. Birinshi qadam - básekelestik orta men ózin-ózi retteıtin uıymdarǵa berý úshin memlekettik organdardyń qyzmetine jyl saıyn túgendeý júrgizý. Aǵymdaǵy jyly bul jumys mamyr aıynyń sońyna deıin júrgziledi. Ekinshi qadam - naryqtyq daıyndyǵyna saraptama júrgizý. Básekelestik orta men úkimettik emes sektormen ózara is-qımylda negizgi ról Ulttyq kásipkerler palatasy men Qazaqstannyń Azamattyq alıansyna júkteledi. Úshinshi qadam - túgendeý men naryqtyń daıyndyǵyna júrgizilgen saraptama negizinde komıssııa Úkimetke sheshim qabyldaý úshin usynys engizetin bolady. Bul qadamdy aǵymdaǵy jyldyń qyrkúıeginde aıaqtaý josparlanǵan», - dedi M.Qusaıynov.

Onyń atap ótýinshe, munan ary usynystardy Úkimettiń maquldaýyn eskere otyryp, memlekettik organdar zańnamalyq jumystar arqyly naryqqa qyzmetterdi tikeleı berýge kirisedi.

Sonymen qatar vıtse-mınıstr óz baıandamasy barysynda Ult josparynyń 97-qadamyna sáıkes ózin-ózi retteý jáne jergilikti ózin ózi basqarýdy damytý arqyly sheshim qabyldaý protsesine azamattardyń qatysý múmkinshiligin keńeıtý qarastyrylǵanyn atap ótti. Bul qadamdy júzege asyrý barysynda álemdik úzdik tájirıbe zerdelengen ári AQSh-tyń qoldanystaǵy ádisteri negizge alynǵan. Sáıkesinshe zań jobasy aǵymdaǵy jyldyń shildesinde komıssııa nazaryna usynylatyn bolady.